Aktivistja Zhaklin Lekatari ka reaguar lidhur me ngjarjen e rëndë të ndodhur më 2 janar të këtij viti, kur 41-vjeçarja Bedrie Loku, nënë e 4 fëmijëve i dha fund jetës duke konsumuar fotoksinë.
Policia po heton ngjarjen në të paktën dy pista për të zbuluar shkakun që ka shtyrë 41-vjeçaren në vetëvrasje. Pista e parë është ajo e bullizimit të viktimës përmes një adrese false në TikTok, ndërsa pista e dytë e ngritur nga familjarët e saj, është ajo e dhunës në familje.
Lekatari në reagimin e saj shprehet se shoqëria shqiptare patriarkale kolektiviste është ajo që e vrau 41-vjeçaren Bedrie Loka në Durrës, e cila u vetëhelmua me fotoksinë.
Komentet Lekatari i bëri në një lidhje për Euronews Albania, ku tha se ishte çuditur edhe nga fjala e vëllezërve të saj, të cilët e dinin që e reja dhunohej prej 23 vitesh dhe nuk bënë asgjë për ta ndihmuar.
Ajo shtoi gjithashtu se dhuna në shoqërinë shqiptare është normalizuar dhe edhe në momentet që bisedojmë me njëri-tjetrin, sipas saj përdoret dhunë.
“E vrau mentaliteti, e vrau mosdija, e vrau dhuna, dhuna virtuale, emocionale, spikologjike, shtrëngimi që ka ndjerë prej kohësh. Mentaliteti është ai i një shoqërie patriarkale kolektiviste. Kjo duket edhe nga deklarata e nuses, që thotë se unë jam nuse, bijë kapedanësh dhe nuk mund të turpërojë familjen time.
Ajo që më shqetëson mua është edhe deklarata e vëllait është dhuna që vëllai i vetë ka përdorur edhe në kërkesën për ndihmë. Këta 4 vllezër duke e ditur që motra e tyre prej 23 vitesh dhunohej, mund të bënin diçka të vogël për të ndihmuar motrën e tyre.
Dhuna është normalizuar dhe ne kur komunikojmë me njëri tjetrin bisedojmë dhunshëm. Pra nuk është Tik Tok shkaku i dhunës. Kështu që ne jemi ata që e vramë Bedrie Lokën”, tha Lekatari.
Discussion about this post