Ferdinand Xhaferaj do të zëvendësojë Flamur Nokën në postin e nënkryetarit të Komisionit Parlamentar të Sigurisë Kombëtare.
Ferdinand Xhaferaj është propozuar nga PD dhe është miratuar në nisje të seancës së sotme në Kuvend.
Lulzim Basha shkarkoi me datë 11 tetor Flamur Nokën nga pozicioni i nënkryetarit të Komisionit të Sigurisë.
Arsyeja e këtij vendimi, sipas PD-së është se Noka e ka shndërruar mbledhjen e kryesisë së Grupit Parlamentar në laborator të prodhimit të gënjeshtrave dhe me këtë po baltoste kryetarin dhe vetë Partinë Demokratike, duke sajuar gjëra të pathëna. Basha tha se këto shpifje dëmtojnë interesin e PD-së dhe të demokratëve.
Flamur Noka ishte ndër të parët deputetë në radhët e PD-së i cili ka dalë hapur kundër vendimit të kreut të PD-së për përjashtimin e Sali Berishës nga grupi parlamentar. Madje ai është parë që ka qëndruar krah Berishës edhe në takimet ‘Foltorja’ që po zhvillon ky i fundit në çdo qytet të Shqipërisë.
