Bullgaria, e cila ka një ndër shkallët më të ulëta të vaksinimit kundër Covid-19 në Evropë, ka nivelin më të lartë të vdekjeve nga koronavirusi për 100.000 banorë në botë.
Ky shtet ka regjistruar 338.83 vdekje për 100.000 banorë, ndërsa në vendin e dytë është Brazili me 287.46 vdekje për 100.000 banorë, sipas të dhënave të Universitetit “Johns Hopkins”.
I vetmi shtet tjetër evropian në listën e pesë vendeve me shkallën më të lartë të vdekjeve është Rumania, në vendin e tretë, me 237.73 vdekje për 100.000 banorë, shkruan The Guardian.
“Në çdo ditë Bullgaria humb njerëz sa në një aksident me avion. Është vërtet e tmerrshme”, tha për “Euronews” Ruzha Smilova, drejtore e programit në Qendrën për Strategji Liberale.
Ndërkohë Kosova po vazhdon të shënojë shifra të vogla të infeksioneve dhe viktimave të Covid-19, por profesionistët shëndetësorë kanë kërkuar vaksinim më masiv.
Kryetari i Shoqatës së infektologëve të Kosovës, Hamdi Ramadani, e konsideron shqetësues rritjen e hezitimit të qytetarëve për vaksinim, sidomos te të rinjtë. Ai thotë se qytetarët nuk duhet të kenë frikë nga efektet e vaksinimit, por nga ndikimi i sëmundjes.
