Armando Ndreca, punonjës i Drejtorisë Rajonale të Hetimit Tatimor në Shkodër dhe vëllai i deputetit socialist të qarkut të Lezhës, Eduard Ndreca, është arrestuar nga policia me dyshimin se është përfshirë në kultivimin e kanabisit.
32-vjecari Ndreca, që shihni në foto, është ndaluar në qytetin e Lezhës.
Ndalimi i vëllait të deputetit socialist erdhi pas një hetimi disamujor të Policisë së Lezhës për kultivimin e kanabisit në pyjet e Kashnjetit. Policia ndërhyri dhe arrestoi Armando Ndrecën, kunatin e tij, Armel Nikdukaj, 27 vjeç dhe shokun e tij, Elvis Shpellzai 28 vjeç.
Si Nikdukaj ashtu dhe Shpellzai u kapën në stanin që ishte përshtatur si “shtëpi bari”. Gjatë operacionit, u sekuestruan 2973 bimë narkotike, disa prej tyre fidanë të gatshëm për t’u kultivuar në tokë, një sasi lënde narkotike kanabis sativa, 50 llamba, pajisje ventilimi dhe tre celularë. Ndërsa gjatë kontrollit në banesat e Nikdukajt dhe Shpellazit në qytetin e Koplikut u sekuestruan 3 armë të ftohta dhe një maskë.
Burime nga grupi hetimor bënë të ditur se oficerët e antidrogës kanë mbajtur në vëzhgim prej disa muajsh dy kultivuesit e kanabisit. Po kështu telefonat e tyre kanë qenë në përgjim, ndërsa komunikimet e Armel Nikdukajt me kunatin e tij Armando Ndreca janë pjesë e dosjes hetimore.
Para dy vitesh, policia arrestoi vjehrrin e Ndrecës, Ramiz Nikdukaj, pasi kishte ngritur një “shtëpi bari”. Edhe në këtë rast dyshohej se vëllai i deputetit ishte pronari i drogës.
Discussion about this post