Armando Ndreca, vëllai i deputetit të PS, Eduard Ndreca është një nga tre personat e arrestuar nga Policia e Lezhës, që ka zbuluar një “shtëpi bari” në fshatin Kashnjet. Në pranga kanë rënë edhe Armel Nikdukaj (kunati i Ndrecës) dhe Elvis Shpellzai.
Tre të ndaluarit akuzohen se kanë lidhje me hashashin që u gjet në një stan në pyjet e fshatit Kashnjet. Droga, sipas bluve, kultivohej nëpërmjet llambave, që furnizoheshin me lidhje të paligjshme të energjisë elektrike.
Aksioni
Aksioni i koduar “Imazhi 1”, konfirmuan burime zyrtare nga blutë, u krye nga komisariati i Lezhës, në bashkëpunim me shërbimet e Forcës së Posaçme Operacionale të DVP Lezhë, me mbështetjen e informacioneve nga inteligjenca policore.
Gjatë operacionit, në pyjet e fshatit Kashnjet, u zbulua një stan i përshtatur me llamba që furnizoheshin me lidhje të paligjshme të energjisë elektrike, për kultivim të bimëve narkotike.
Gjithashtu, shton policia, u bë i mundur identifikimi, kapja dhe arrestimi në flagrancë i autorëve të dyshuar të këtij rasti, shtetasve Armando Ndreca, 27 vjeç dhe Elvis Shpellzai, 28 vjeç, të dy banues në Koplik. Më tej, në vijim të veprimeve hetimore dhe procedurale për këtë rast, u ndalua dhe Armel Nikdukaj dhe, 32 vjeç, banues në Lezhë, pasi dyshohet se është i përfshirë në këtë veprimtari kriminale.
Çfarë u sekuestrua
Nga ky ambient, Policia ka sekuestruar në cilësinë e provës materiale: 2973 bimë narkotike (disa prej tyre fidanë të gatshëm për t’u kultivuar në tokë), një sasi lënde narkotike kanabis sativa, 50 llamba, pajisje ventilimi, sende të tjera që i shërbenin kësaj veprimtarie kriminale dhe 3 celularë.
Më tej, në banesat e dy prej të arrestuarve, Policia gjeti 3 armë të ftohta dhe 1 maskë.
Dosja hetimore i është referuar prokurorisë së Lezhës, njoftoi policia.
Lexo edhe:
Discussion about this post