Kreu i Partisë Demokratike, Sali Berisha ka ironizuar daljen publike ditën e djeshme të Belinda Ballukut pas shkarkimit nga detyra e zëvendës kryeministres dhe ministres, teksa i kaloi stafetën Enea Karakaçit në ministrinë e Infrastrukturës dhe Energjisë.
Në konferencën me Departamentin e Arsimit dhe Shkencës me rastin e 7 Marsit, teksa foli për arsimin, kryedemokrati kërkoi që të bëhen të gjithë bashkë në protesta për të larguar qeverinë e kryeministrit Edi Rama.
Ai u ndal edhe te Balluku, teksa tha se doli ditën e djeshme serbes serbes duke bërë “heroinën” para ish stafit të saj, ndërsa shtoi me ironi se “midis hajdutëve ai që vjedh më shumë është hero”.
“Shikoni se çfarë bën, del ajo, është bërë figurë e zezë në të gjithë botën, nuk ka media e madhe pa e lakuar Belinda Ballukun, Lubi Ballukun. Të gjitha mediat e botës. Nuk ka ngelur kancelari në botë që nuk e ka emrin e saj dhe dilte dje serbes-serbes dhe bënte ndarjen si heroinë e tyre. Po natyrisht midis hajdutëve, ai që vjedh më shumë është hero. Dhe ata e duartrokisnin.
Ju e patë se si Lubi Balluku mblodhi ministrinë dhe me duartrokitje dhe mallëngjime u paraqit para tyre sikur të ishte heroinë dhe jo një delinkuente e zezë, hajdutja më e madhe që kombi ka pasur në tërë historinë e vet.
Ju e patë sfidën që ajo u bëri qytetarëve shqiptarë, e cila po bëhet kazus, po bëhet shkak për rrënimin e të ardhmes së çdo shqiptari.
Ju e patë se ajo me tekstin e përgatitur nga Edi Rama zotohej se ajo nuk ka kryer asnjë vepër, por ka realizuar suksese të mëdha dhe nuk ka bërë korrupsion.
Këto janë zhvillime dramatike.
Këto zhvillime janë një apel, një kushtrim për çdo qytetar të këtij vendi, pavarësisht nga bindjet politike, të bashkohemi për largimin sa më të parë të Edi Ramës si një rrezik madhor kombëtar për çdo shqiptar, për qenien dhe të ardhmen tonë”, tha Berisha.
Discussion about this post