Ministrja e Arsimit, Evis Kushi iu është drejtuar me një mesazh nxënësve, mësuesve dhe prindërve me rastin e fillimit të mësimit plotësues.
Në një postim në Facebook, ministrja Kushi shkruan se shkollat janë gati për mësimin plotësues, i cili sipas saj u vlerësua nga ekspertët, mësuesit dhe prindërit si një nevojë, sidomos për nxënësit në zonat e riskut në kohën e kulmit të pandemisë.
“Për këtë periudhë shkollat tuaja kanë përgatitur një program gjithëpërfshirës, që përveç përsëritjes apo përforcimit të njohurive, përmban edhe aktivitete argëtuese dhe sportive. Prandaj shfrytëzojeni këtë mundësi sepse kjo do t’ju ndihmojë që të jeni sa më të përgatitur dhe ta nisni vitin e ri shkollor me njohuri të rikuperuara, e mbi të gjitha, me dëshirë e pasion për të mësuar akoma më shumë,”- shton Ministrja Kushi.
Duke iu drejtuar prindërve dhe mësuesve, Kushi shprehet se puna, bashkëpunimi dhe solidariteti që kanë treguar, ka ndihmuar shumë në punën e përbashkët përgjatë vitit të vështirë që kaloi.
Në përfundim të mesazhit Ministrja Kushi u ka rikujtuar të gjithëve që të mos harrojnë kujdesin ndaj rregullave anti-Covid, për të ruajtur shëndetin dhe të afërmit.
