Mazhoranca socialiste artikuloi edhe në seancën plenare të kësaj të enjteje qëndrimin për mbrojtjen e deputetes Olta Xhaçka, pavarësisht opinionit të Komisionit të Venecias që rrëzoi pretendimet e PS.
Në dokumentin e publikuar të Martën, duke iu përgjigjur disa pyetjeve të kryeparlamentares Elisa Spiropali, “Venecia” artikuloi se “kur një vendim i Gjykatës Kushtetuese interpreton Kushtetutën si kufizuese për kompetencat vendimmarrëse të Parlamentit, ky i fundit duhet të miratojë vendimin në përputhje me gjykimin e Gjykatës dhe të votojë mbi çështjen e kufizuar, ashtu siç është përcaktuar nga Gjykata Kushtetuese”.
Opinioni i Venecias sqaron qartazi se Kuvendi dhe mazhoranca socialiste e ka detyrim të zbatojë vendimin e Gjykatës Kushtetuese për të votuar për shqyrtim nga kjo gjykatë pajtueshmërinë e mandatit të deputetes socialiste Olta Xhaçka.
Megjithatë, në reagimet e para pas publikimit të opinionit, socialistët i bënë një lexim të rremë dhe vijuan mbrojtjes politike ndaj ish-ministres Xhaçka.
Qëndrimi është përsëritur edhe në seancën plenare të kësaj të Enjteje nga deputetë dhe ministra të PS-së.
“Më vjen mirë që opinioni i Venecias ka shkruar të zezë mbi të bardhë se parlamenti nuk është i detyruar të votojë në një mënyrë të caktuar, por gjithmonë është në gjendje të votojë çështje brenda kompetencës së vet”, tha ministri Taulant Balla.
“Për opinionin e Venecias ju do kishit dalë të na thonit po të drejtë mazhorancës. Na dha të drejtë ne jo ju”, tha ministri Ulsi Manja.
“Parlamenti nuk është i detyruar të votojë në një mënyrë të caktuar, por mund të votojë vetëm për çështje që bien brenda kompetencës së tij”, deklaroi kreu i grupit parlamentar socialist Niko Peleshi.
Opozita nga ana tjetër dënoi qëndrimin e mazhorancës dhe kërkoi zbatimin e vendimit të Gjykatës Kushtetuese për deputeten Olta Xhaccka.
Kreu i grupit parlamentar demokrat, Gazment Bardhi i bëri thirrje kryetares së Kuvendit që të fuste në rendin e ditës çështjen e mandatit të Xhaçkës, duke theksuar se duhet t’ia dorëzojnë Gjykatës Kushtetuese që të vendosë për mandatin e saj.
“Nuk mund të ngrini lirinë tuaj të votës kur bëhet fjalë për zbatimin e vendimeve të Gjykatës Kushtetuese. Nuk mund të konsiderohet si imponim i një mënyre votimi, por si një përmbushje përgjegjësie për të respektuar vendimet e Gjykatës Kushtetuese. Prandaj, zonja Kryetare, fusni menjëherë në rendin e ditës, dorëzojani menjëherë drejtësisë Olta Xhaçkën, të vendosë Gjykata Kushtetuese e Shqipërisë nëse është apo jo në kushtet e papajtueshmërisë së mandatit. Çdo sjellje kundër ndaj kësaj është minimi i shtetit të së drejtës, i parlamentarizmit, minim i Kushtetutës së Republikës së Shqipërisë”, tha Bardhi.
Deputeti Flamur Noka u shpreh se “çështja Xhaçka është varri që sulltani juaj (Rama) i ka hapur drejtësisë në këtë vend”.
Kreu i PD-së Sali Berisha paralajmëroi rinisjen e “mosbindjes civile” brenda Kuvendit nëse mazhoranca nuk zbaton vendimin e Gjykatës Kushtetuese.
“Ne kërkojmë të respektoni Kushtetutën, përndryshe mosbindja civile do vijë edhe në sallë. Po, do vijë në sallë. Nuk mund të shkelmoni ju Kushtetutën sipas qejfit tuaj. A mund të rrihet në parlament me një hajdute që ka marrë tokën publike si ministre”, tha kryedemokrati.
Në një prononcim për mediat jashtë Kuvendit, ai theksoi se “mbrojtja që i bën Edi Rama, Olta Xhaçkës, është mbrojtje që ai i bën aksioneve të veta që ka në të gjithë investitorët strategjikë, përfshi edhe burrin strategjik të Olta Xhaçkës, Artan Gaçi”.
Discussion about this post