Deputetja e Partisë Demokratike, Ina Zhupa, ka rikthyer sot shqetësimin për funksionimin e Kuvendit të Shqipërisë nën drejtimin e mazhorancës, duke e cilësuar atë si një “noter të projektligjeve të qeverisë”. Në një intervistë për SYRI TV, Zhupa akuzoi shumicën parlamentare për bllokimin sistematik të çdo nisme apo kërkese për debat nga opozita, në shkelje të rregullores së Kuvendit dhe Kushtetutës.
“Kjo situatë ka nisur që në fillim të kësaj legjislature. Edi Rama e ka kthyer Kuvendin në një noter të vendimeve të qeverisë, duke mohuar rolin tonë si deputetë për të përfaqësuar interesin publik,” deklaroi Zhupa.
Deputetja theksoi se çdo kërkesë për debat nga opozita rrëzohet automatikisht nga mazhoranca, pavarësisht mbështetjes në rregulloret parlamentare. Ajo përmendi dy mocione të dorëzuara javën e kaluar — një për procesin e integrimit dhe një tjetër për dënimin e gjenocidit serb në Kosovë — të cilat u refuzuan pa diskutim në Konferencën e Kryetarëve.
Zhupa njoftoi se këtë javë opozita ka propozuar një mocion të ri për krijimin e një komisioni të posaçëm parlamentar për hetimin e fondeve IPARD të Bashkimit Evropian, të cilat sipas saj janë abuzuar dhe aktualisht janë pezulluar për Shqipërinë.
“Fondet IPARD janë vjedhur. Duhet një skaner i plotë për të rikuperuar ato që janë tjetërsuar ndër vite nga individë të lidhur me grupe kriminale,” tha deputetja, duke kërkuar transparencë dhe përgjegjësi institucionale.
Discussion about this post