Delegatët e Kuvendit të Sali Berishës kanë miratuar në parim statutin e ri të Partisë Demokratike, ndërsa Kuvendi Kombëtar i PD është vendosur të rimblidhet sërish më 22 mars të vitit 2022.
“Kuvendi vendosi ngritjen e Komisionit të rithemelimit të Partisë Demokratike me përbërje, Agron Shehaj, Albana Vokshi, Belind Këlliçi, Bujar Nishani, Edith Harxhi, Edi Paloka, Edmond Spaho. Ervin Minarolli, Flamur Noka, Genc Memaj, Genc Pollo. Gent Strazimiri, Keltis Kruja, Ledina Mandija, Mimoza Hajadrmamataj, Oerd Bylykbashi dhe Sali Berisha”, tha Këlliçi.
Delegatët e thirur në “Air Albania” kanë vendosur shkarkimin e Sekretarit të Përgjithshëm të PD-së, Gazment Bardhi si edhe të tre nënkryetarëve, Grida Duma, Jorida Tabaku dhe Enkelejd Alibeaj.
Shkarkimi i tyre u bë me argumentin se nuk ishin zgjedhur sipas statutit të partisë. Pas shkarkimit të tre nënkryetarëve dhe Bardhit, Kuvendi vendosi që të përdorë votë të fshehtë për shkarkimin ose jo edhe të kryetarit të PD-së Lulzim Basha, votimi që do të mbahet në orët në vijim.
“Në mbështetje të nenit 43, të statutit të Partisë Demokratike me propozimin e një grupi të delegatëve Kuvendi Kombëtar vendosi të votojë me votim të fshehtë të delegatëve për shkarkim të kryedemokratit Lulzim Basha për dëmtim të rëndë të interesave politike. Votimi do kryhet gjatë zhvillimit të Kuvendit. Fleta të përmbajë pyetjen. A jeni dakord me shkarkimin e Lulzim Bashës? Vendimmarrja e dalë nga Kuvendi do të hidhet në votim edhe në çdo degë të PD në 18 Dhjetor 2021. Fleta e votimit në referendum të përmbajë pyetjen. A jeni dakord me vendimin e Kuvendit Kombëtar për shkarkimin e Lulzim Basha? Ky vendim miratohet me votim të hapur dhe hyn në fuqi menjëherë”, tha Këlliçi.
Nga ana tjetër, Basha po zhvillon një ceremoni në selinë blu me rastin e 31-vjetorit të themelimit të PD, ku i bëri thirrje demokratëve të mos turbullohen nga e shkuara, referuar Berishës.
Discussion about this post