Kuvendi i Shqipërisë do të nisë punimet ditën e nesërme, ku mësohet se seanca plenare do të ndahet në dy pjesë. Fillimisht Kuvendi do të mblidhet në orën 10:00 e më pas në 17:00.
Në seancën e orës 10:00 do të ngrihet Komisioni për Verifikimin e Mandateve, ndërsa në seancën e pasdites, pritet të betohet kryetari i Kuvendit dhe 140 deputetët e rinj.
140 deputetët e dalë nga zgjedhjet e 25 Prillit, nga ku 74 PS, 59 PD, 4 LSI dhe 3 PSD, do të ulen në sallën e Kuvendit për të shënuar nisjen zyrtarisht të kësaj legjislature.
Rregullorja e Kuvendit përcakton se drejtues i seancës së parë plenare është deputeti më i vjetër në moshë, deri në zgjedhjen e Kryetarit të Kuvendit. Këtë përgjegjësi do e ketë deputetja e PS-së Luljeta Bozo.
Kryeministri Rama ka propozuar emrin e ish-ministres së Arsimit, Lindita Nikolla për të drejtuar Parlamentin në këtë legjislaturë. Procedura saktëson se emri i saj do të duhet të propozohet nga të paktën 15 deputetë, ndërkohë që zgjidhja zhvillohet pa debat dhe me votim të fshehtë.
