Seanca parlamentare e ditës së sotme nisi me debate mes demokratëve dhe kryetares së Kuvendit, Lindita Nikolla lidhur me vendimin e marrë nga Konferenca e Kryetarëve për të reduktuar kohën e qëndrimit në sallë duke sjellë kështu një reduktim të kohës që deputetët kanë të drejtë të flasin.
Demokratët akuzuan Nikollën se po përpiqej t’i mbyllte gojën opozitës, por kjo e fundit tha se ky vendim ishte marrë për të bërë të mundur kufizimin e mundësive për të përhapur virusin. Ndërsa, deputeti Gazment Bardhi e kundërshtoi me argumentin se në stadium kishin qenë mbi 20 mijë tifozë dhe atje nuk kishte qenë ky lloj rreziku.
Bardhi: Nuk është në kompetencë të konferencës parlamentare, por e vetë Kuvendit për të përcaktuar një rregullore që rregullon bashkëjetesën tonë këtu. Ju e nisni seancën duke thënë se nuk diskutoni vendimin e marrë nga Balla. Koha e përcaktuar vendoset vetëm kur ka një çështje konkrete. Nuk ka ndodhur kurrë në 30 vite parlament ku u thuhet se do flasin gjithsej 100 minuta ndërkohë që rregullorja na njeh të drejtën të flasim 680 minuta. Ju duhet të mblidhni konferencën e kryetarëve për ta ndryshuar këtë vendim. Kush është arsyeja që e keni marrë këtë vendim në shkelje të nenit 48 të rregullores.
Nikolla: Jemi në kohë Covidi dhe prandaj duhet të ketë një orar të tillë.
Bardhi: Kush ju ka thënë juve se këtu përhapet virusi ndërsa në stadium nuk u përhapka virusi.
