Kuvendi i Shqipërisë do të zhvillojë sot, në orën 10:00, seancën e radhës plenare, në një klimë të tensionuar politike pas protestave të dhunshme të zhvilluara gjatë ditëve të fundit.
Kjo është seanca e parë parlamentare që nga nisja e protestave, ndërsa vëmendja pritet të përqendrohet te situata e krijuar në vend dhe reagimi i institucioneve përballë zhvillimeve të fundit.
Në qendër të diskutimeve pritet të jetë interpelanca urgjente me ministrin e Punëve të Brendshme, Ervin Demo, e kërkuar nga një grup deputetësh të Partisë Demokratike. Gjatë kësaj interpelance pritet të diskutohet për menaxhimin e protestave, veprimet e Policisë së Shtetit dhe përplasjet e regjistruara ditët e fundit.
Rendi i ditës përfshin gjithashtu dy interpelanca me ministrin e Infrastrukturës dhe Energjisë, Enea Karakaçi, të kërkuara nga deputetët Ermal Pacaj dhe Tedi Blushi. Ky i fundit ka kërkuar edhe një interpelancë me ministrin e Financave, Petrit Malaj.
Përveç interpelancave, deputetët do të shqyrtojnë disa projektligje, si dhe projektvendimin për ngritjen e Komisionit të Posaçëm Parlamentar për fazën e dytë të Reformës Administrativo-Territoriale.
Ndërkohë, kryeministri Edi Rama nuk pritet të marrë pjesë në seancë, pasi ndodhet në Budva të Malit të Zi, ku zhvillon një takim zyrtar.
Seanca e sotme pritet të shoqërohet me diskutime mes mazhorancës dhe opozitës, veçanërisht për zhvillimet e fundit politike dhe sociale në vend. Interpelanca me ministrin e Brendshëm pritet të jetë një nga pikat kryesore të debatit parlamentar.
Revolta studentore dhe qytetare kundër qeverisë do të vijojë edhe sot, më 22 tetor, me një tjetër protestë të paralajmëruar para Parlamentit, në një ditë kur deputetët pritet të mblidhen në seancë plenare.
Protestuesit u kanë bërë thirrje qytetarëve të bashkohen në tubimin që do të nisë në orën 09:00, përpara godinës së Kuvendit. Thirrja vjen pas ditës së nëntë të protestës, e cila vijoi edhe këtë të mërkurë me qëndrimin para Kryeministrisë dhe marshimin drejt sheshit “Skënderbej”.
Discussion about this post