Laçi ia del të mbyllë 1-0 90 minutat e ndeshjes së kthimit ndaj Podgoricës. Ekipi malazez fitoi 1-0 në shtëpi sfidën e parë të raundit të parë të Conference League, teksa bardhezinjtë e Duros triumfuan 1-0 në “Elbasan Arena” falë golit të Ardit Deliut.
Mesfushori kavajas gjeti rrugën e rrjetës pas një ore lojë, pasi një asisti të marrë nga Zarubica. Dominim total i skuadrës kurbinase, që u frenua nga një super Nikola Ivezic. Portieri 18-vjeçari kreu disa pritje fantastike mbrëmjen e sotme.
Deliu, Lushkja, Mazrekaj, Guindo dhe Shehu humbën shumë raste përballë “gardianit” të Podgoricës. Sfida ka shkuar në shtesa dhe duhet të presim për skuadrën që do të kualifikohet në raundin e dytë të Conference League, aty ku fituesi do të ketë përballë rumunët e Univ Craiova.
