I dërguari i BE-së në dialogun Kosovë-Serbi, Miroslav Lajçak theksoi dhe njëherë se integrimi i Ballkanit Perëndimor në BE është e vetmja alternativë, teksa në të njëjtën kohë theksoi që marrëdhënia mes Serbisë dhe Kosovës ndikojnë në të gjithë rajonin.
“Sfida e rëndësisë më të madhe strategjike është normalizimi i marrëdhënieve midis Beogradit dhe Prishtinës, sepse nuk ka të bëjë vetëm me dy vende duke marrë parasysh se shqiptarët dhe serbët jetojnë në çdo vend të Ballkanit dhe se marrëdhëniet ndërmjet Serbisë dhe Kosovës ndikojnë në bashkëpunimin rajonal, ndaj zgjidhja e kësaj çështjeje është e një rëndësie strategjike më të madhe”, tha sllovaku.
Ai nënvizoi se Maqedonia e Veriut dhe Shqipëria duhet të nisin negociatat për anëtarësimin e tyre në BE, teksa u ndal të komentonte dhe krizën në Bosnje-Hercegovinë
“Maqedonia e Veriut dhe Shqipëria urgjentisht duhet të fillojnë negociatat për anëtarësim në BE dhe kjo duhet të bëhet sa më shpejt të jetë e mundur. Problemi serioz është edhe kriza në Bosnje-Hercegovinë”, tha Lajçak gjersa ka shtuar se “qeveria malazeze aktualisht nuk e ka shumicën në parlament dhe ky problem duhet të adresohet”.
Lajcak shtoi se sfida më e madhe është drejtimi që Ballkani Perëndimor do të merr dhe nëse rruga e tij do të jetë konform me atë të vlerave që BE përfaqëson.
“Dhe sfida që mendoj se është më themelore është pyetja se si do të jetë Ballkani. A do të ketë një Ballkan që ndan vlerat evropiane, që promovon demokracinë dhe sundimin e ligjit, që lufton korrupsionin dhe që ka media të pavarura dhe shoqëri civile? Ose do të kemi shoqëri në të cilat nuk ka asgjë të tillë pa pasur një lloj qeverie autoritative, pa respektuar vlerat evropiane”, përfundoi ai.
Lajçak kohët e fundit ka qëndruar në shtetet e rajonit, ku është takuar me liderët shtetëror.
Discussion about this post