Një tjetër operacion ndërkombëtar antidrogë është zhvilluar mes SHBA dhe Shqipërisë. Në kuadër të aksionit të koduar “Detroit është bërë I mundur arrestimi në flagrancë i një shtetasi të huaj i kërkuar nga drejtësia amerikane, për trafikim të lëndëve narkotike dhe pastrim të produkteve të veprës penale.
Policia jep detaje se në bazë të informacioneve të marra nga Zyra e DEA-s në Athinë, i huaji i cili është përfshirë në veprimtari kriminale në fushën e narkotikëve mund të hynte në territorin shqiptar, menjëherë organizoi punën për lokalizimin e vendndodhjes dhe arrestimin e këtij personi.
Arrestimi është bërë në rrugën nacionale Tamarë-Hani i Hotit, të kapej dhe të vihej në pranga L. V., 41 vjeç.
Materialet procedurale i kaluan Prokurorisë së Rrethit Gjyqësor Tiranë, me qëllim fillimin e procedurave te ekstradimit drejt SHBA-së, sepse Gjykata e Michiganit/ Shtetet e Bashkuara të Amerikës, me vendimin e datës 09.06.2021 i ka vendosur këtij shtetasi, masën e sigurisë “Arrest në burg” për veprat penale “Trafikimi i lëndëve narkotike” dhe “Pastrimi i produkteve të veprës penale”.
Policia e Shtetit është e angazhuar dhe e vendosur për të punuar bashkërisht me partnerët në luftën kundër krimit të organizuar, me qëllim kapjen dhe vënien para drejtësisë të të gjithë atyre që ushtrojnë këtë veprimtari kriminale.
