Federata e Futbollit të Danimarkës ka reaguar me anë të një komunikate zyrtare, aty ku konfirmohet gjendja e mirë shëndetësore e Christian Eriksen. Fantazisti i Interit u shemb në tokë gjatë ndeshjes së Euro 2020 ndaj Finlandës.
Një ngjarje që i tmerroi të gjithë, por 29-vjeçari shpëtoi dhe vazhdon të kurohet në spitalin më të mirë të Kopenhagenit. “Këtë mëngjes kemi biseduar me Christian Eriksen, i cili i ka dërguar përshëndetjet e tij shokëve të skuadrës.
Gjendja e tij është e stabilizuar, teksa vazhdon të kurohet në spital për kontrolle të mëtejshme. Skuadra ka marrë ndihmë nga stafet që merren me përballimin e krizave dhe do vazhdojnë të mbështesin njëri-tjetrin pas ngjarjes së djeshme.
Duam të falënderojmë të gjithë ata që i kanë dërguar përshëndetje të përzemërta Christian Eriksen, duke nisur nga tifozët, futbollistët, Familjet Mbretërore të Danimarkës dhe Anglisë, klubet e ndryshme apo edhe shoqatat ndërkombëtare.
Ne inkurajojmë çdokënd të nisë mesazhe dhe përshëndetje në Federatë, të jeni të sigurt që do ua kalojmë të gjithë Eriksenit dhe familjes së tij“, mbyllet letra e Federatës vikinge.
