Ish-kapiteni i njohur i kombëtares shqiptare, Altin Lala komentoi situatën e Shqipërisë në emisionin “Kuq e Zi” në SuperSport. Ish-mesfushori analizoi duelin ndaj Polonisë, teksa u ndal gjatë edhe te gjendja e skuadrës së Sylvinhos.
“Jemi të gjithë kuriozë, pasi është ndeshja e parë. Sylvinho do të ndryshonte nga mungesat ë kemi. Formacioni nuk më duket keq, të shohim. Është ndeshja e parë për trajnerin, ai nuk ka pasur shumë kohë. Shpresoj të ketë bërë zgjedhjet e duhura.
Mungesat? Gjimshiti ka bërë jashtëzakonisht mirë, Ismajli gjithashtu. Broja, një ndër sulmuesit më të mirë që kemi pasur. Roshi dhe Çekiçi? Ai duhet të marrë disa vendime. Roshi ka bërë mirë, por nuk e di çfarë ka menduar trajneri. Ndoshta nuk i pëlqen tipi i lojtarëve, nuk jemi në kokën e trajnerit. Por, unë mendoj se ata mund të rikthehen në Kombëtare.
Humbja e Polonisë në start? Do të ketë shumë presion Polonia. Është e rëndësishme ta mbajmë kundërshtarin larg portës tonë në 20 minutat e para. Por jo duke u tërhequr shumë. Mund t’i godasim pastaj me Uzunin dhe Cikalleshin. Është avantazh humbja e Polonisë, ata do të kenë më tepër presion.
Ne duam të jemi të gjithë kapitenë. Fakaj s’e ka kërkuar shiritin në kohën tonë? Fakaj ishte ushtar, sepse ishte nga Vlora… Shiriti i kapitenit është shenjë respekti. Në Kombëtare nuk është se do të bësh kontratë apo do të fitosh më tepër para. Kombëtarja është krenari, që të kënaqësh njerëzit dhe popullin tënd. Më tepër jemi individualë ndonjëherë, ky është një problem që na ka shoqëruar. Kemi lojtarë shumë të mirë.
A i mungon një lidership Kombëtares? Unë mendoj se fryma që do të sjellë trajneri, zgjedhja e lojtarëve të duhur. Nuk ka të bëjë gjithmonë kualiteti. Do e kesh të vështirë të arrish sukses nëse nuk krijon grup. E ka treguar edhe Kroacia. Ata kanë mentalitet tjetër, janë të gjithë profesionistë kur futen në fushë.
Kemi lojtarë me eksperiencë. Kemi Berishën, kemi edhe lojtarë të rinj. Nuk ka të bëjë vetëm mosha, por edhe karakteri. Në të kaluarën kemi pasur gjithmonë grupe grupe. Kemi qëndruar 10-15 lojtarë bashkë. Është shumë e rëndësishme të krijosh grupin në Kombëtare. Ne kemi problem edhe me gjuhën shqipe, kemi përkthyes.
Nëse ndihet fryma e skuadrës, pse të mos kemi sukses. Nuk po them të kemi gjashtë kapitenë”, përfundoi Altin Lala.
/Supersport
Discussion about this post