Ku do të fluturojë këtë radhë kryetarit të bashkisë Tiranë, Erion Veliaj alias Lali Eri? Kryebashkiaku do të shkojë në ishullin Singapor, i njohur si një nga “katër tigrat” e Azisë për zhvillimin ekonomik. Tashmë është fakt se lali Eri udhëton më shumë se sa gjithë stafi i Ministrisë Jashtme të marrë së bashku, madje ia kalon edhe kryeministrit Rama.
Në kuadër të përgatitjes së këtij udhëtimi, më datë 16 shkurt 2024 është zhvilluar një tender me objekt “Blerje 1 (një) biletë udhëtimi vajtje-ardhje Tiranë – Singapor – Tiranë”. Në dokumentet e bëra publike nuk bëhet me dije as arsyeja përse do të zhvillohet ky udhëtim, por as shpenzimet që do të bëjë Lali Eri.
Ndërkohë, në dokumentet e prokurimit të këtij shërbimi theksohet se kompania që ka fituar tenderin, e cila gjithashtu nuk dihet, duhet të dorëzojë biletat brenda 2 ditëve. Pra ditën e nesërme Veliaj do të ketë në dorë biletën e udhëtimit dhe kështu ka bërë gati çdo gjë për pushime dhe punë në ishullin që është qendra e financave botërore.
Në dokument shohim se udhëtimi do të bëhet me datë 5 mars 2024 rreth orës 7 të mbrëmjes.
Duke supozuar që Veliaj po udhëton për çështje pune, ne do mendonim që ai do të kthehet ditën tjetër, ashtu siç bëjnë të gjithë zyrtarët kur shkojnë për vizita të tilla, por kryebashkiaku i Tiranës ka vendosur të qëndrojë sikur po shkon tek daja.
Dhe jo… nuk do të qëndrojë vetëm një ditë apo dy, por gati një javë, pasi kthimi do të jetë më datë 10 mars 2024 në mesnatë.
Ndërkohë ditën e djeshme kryebashkiaku është nisur për në Berlin. Përmes tenderit me objekt Blerje e 2 (dy) biletave të transportit ajror ndërkombëtar, 1 (një) biletë në datat 16 Shkurt – 19 Shkurt 2024, Tiranë-Berlin-Tiranë, vajtje-ardhje dhe 1 (një) biletë në datë 16 Shkurt 2024, Tiranë Berlin, vetëm vajtje”. Mbase ka shkuar të shoqërojë kryeministrin Rama që ndodhet në Konferencën e Sigurisë në Munih.
Janë të shumta rastet që Gijotina.com ka publikuar tenderat për bileta që ka bërë Veliaj vetëm në këto dy muajt e parë të këtij viti. Kjo na tregon se Lali Eri më shumë rri në ajër se sa punon në zyrë, edhe pse për atë seli ka shpenzuar qindra milionë lekë për arredimin, lyerjen, pastrimin dhe dezinfektimin.
Biletat e udhëtimi blihen me tendera formal ku nuk përshkruhet as vlera e fondit limit. Bileta për në Singapor për momentin kushton 962 euro, por Lali Eri nuk vë shifrën se sa do të shpenzojë.
Me pagën që ka Lali Eri (pa llogaritur të ardhurat e tjera) mund ta paguajë vetë këtë biletë dhe të mos i marrë nga arka e Bashkisë, por kryetarit i pëlqen qyli.
Nuk e dimë se çfarë e lidh bashkinë Tiranë me qytet-shtetin Singapor, sepse zyra e shtypit e Lali Erit nuk ka njoftuar ndonjë marrëveshje apo qëllim për të marrë pjesë në ndonjë takim ndërkombëtar.
Para 7 vjetëve në Singapor ka qenë për vizitë kryeministri Rama, ku u nënshkrua një marrëveshje për transportin ajror. Në atë kohë Singapori u përmend edhe në lidhje me blerjen koncesionit të Aeroportit të Rinasit nga kompania kineze Real Fortress Private Limited. Kompania ishte me bazë në Singapor dhe sipas të dhënave në internet është krijuar në 22 qershor 2016 dhe e ka adresën në 2 SHENTON WAY #18-01 SGX CENTRE i SINGAPORE 068804, duke qenë një kompani offshore. Pas disa vjetësh, koncesioni, nga “kinezët” kaloi tek Kastrati Group.
Lidhur me vizitën e Lali Erit në Singapor, duke parë pozitën e tij të implikuar nga hetimet e SPAK për inceneratorin e Tiranës, urojmë të kthehet prapë dhe të mos e bëjë si Ben Ahmetaj!
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post