Mbretëresha e valles shqiptare, Liljana Cingu ndërroi jetë të hënën në moshën 74-vjeçare. Homazhet për nder të artistes së madhe po mbahen në Teatrin e Operas dhe Baletit në kryeqytet.
Valltarja e njohur e Ansamblit Kombëtar të Këngëve dhe Valleve Popullore është nderuar me urdhrin “Mjeshtër i madh” për kontributin e dhënë.
Valltari Genc Kastrati ndau eksperiencën e tij me Cingun, si dhe takimin e fundit me të.
“Është ditë e trishtë për artin. Me Lilin ndajmë shumë emocione, por sigurisht që s’ka qenë vetëm një valltare e mirë, por një motër, shoqe dhe mikeshë e mirë. Lili Cingu mori pjesë në trajnimin e brezit të ri, ajo ishte si përgjegjëse dhe asistente për brezin e ri. Lili ishte një person që të motivonte që të ecje përpara. Takimi im i fundit me të ka qenë në spital. Një nga porositë e saj ishte që nuk mjafton thjesht puna, por duhet të bëhesh një me publikun. Figura të tilla është e vështirë të zëvendësohen”, u shpreh Kastrati.
“20 vite në skenë pranë Lilit kurrë nuk kam bërë debate. Ajo rrinte gjithmonë e heshtur, ajo ishte modeli ku koreografët bazoheshin. Lili nuk bënte kompromise, nuk mungonte asnjëherë në prova apo angazhime pune, ajo nuk kërkonte kurrë privilegje. Ajo kishte ardhur në këtë botë vetëm për skenën”- tha koreografja Linda Kalemi.
“Unë lajmin e kam marrë vesh nga familjarët e saj, kishte disa ditë që nuk ishte në gjendje të mirë shëndetsore , në kontaktet që patëm herët e fundit si miq ajo kishte shumë energji. Lili ishte një femër me bukuri natyrale fizike të jashtëzakonshme dhe bukuri shpirtërore akoma më të madhe. Sëmundja dhe ikja nga jeta i ndodhi në një kohë shumë të shkurtër, para 2 javëve ajo ishte shumë mirë, ikja e saj ishte e papritur.
Takimi ynë i fundit ka qenë para një muaj kur ajo u kthye nga një udhëtim që ka patur në Angli te të afërmit, kemi pirë një kafe të gjatë bashkë, kemi folur për planet e të ardhmes, kemi folur për projekte që do të vazhdonin gjatë këtij sezoni, ajo nuk ka folur kurrë për probleme që mund të kishte në lidhje me shëndetin”, u shprehet producenti dhe kompozitori Sokol Marsi.
Cingu ka një karrierë të gjatë si valltarja kryesore e Teatrit të Operas dhe Baletit, veçanërisht në Ansamblin e Këngëve dhe Valleve Popullore, përkrah emrave të mëdhenj të skenës. Ajo ka kërcyer valle nga të gjitha krahinat, duke i mbajtur ato gjatë për shumë dekada dhe duke i gdhendur në fondin e artë të artit shqiptar.
Discussion about this post