Problemi me mbetjet urbane ka përfshirë dhe bashkinë Shijak, pjesë e qarkut Durrës. Situata e rëndë mjedisore ka përfshirë edhe këtë bashki, ku si zgjidhje ka gjetur krijimin e një vendgrumbullimi ilegal për depozitimin e mbetjeve urbane.
Gazetari i Gijotina.com i cili ndodhet në terren, ka pyetur banorët të cilët shprehen se kamionët e bashkisë i sjellin gjatë natës mbetjet urbane të Shijakut dhe fshatrave përreth dhe më pas u vënë flakën.
“Makinat e plehrave i sjellin natën në 11, 12 të natës, u vënë flakën dhe ikin. Ka 2-3 javë kjo punë” – u shpreh një nga banorët.
Vendi ku hidhen mbeturinat është shumë pranë zonave të banuara të qytetit Shijak dhe fshatrave “Maminas”, “Metallaj”, “Gjepalaj”, etj, ndërsa era e rëndë dhe kundërmuese është një rrezik kërcënuese për shëndetin e banorëve dhe bagëtinë e tyre.
“Ne vetëm kur shohim tymin që kundërmon. Na kanë hapur punë tani se kullosim bagëtinë këtej dhe bagëtia ha plehrat” – tha një nga barinjtë e zonës.
Gazetari i Gijotina.com ka fiksuar edhe situatën e mbeturinave në qytetin e Shijakut, ku kazanët e mbeturinave janë të tejmbushur dhe nuk është kryer asnjë pastrim i tyre. Për situatën kaotike dhe skandalin e landfillit ilegal të mbetjeve nuk ka reaguar as bashkia Shijak.
