Ish-deputetja e Parlamentit Europian, Doris Pack, ka komentuar sot situatën brenda opozitës shqiptare. Përmes një interviste televizive ajo ka deklaruar se SHBA shpalli ‘non -grata’ Berishën dhe familjen e tij pa pasur asnjë provë. Sa i përket vendimit të Bashës, për të larguar Berishën nga PD, ajo tha se kryedemokrati ka shkelur statutin e partisë. “Nuk e kuptoj dot se si kryetari i partisë sonë simotër, Partisë Demokratike, ju bind kësaj pa i marrë mendimin anëtarëve, pasi në statutin e partisë ai është i detyruar që t’i marri mendim se si duhet të sillet në situata të tilla, dhe mendoj se në këtë mënyrë do të kishte pasur mundësi të gjendej një zgjidhje tjetër, ndryshe nga ajo që ai bëri me mendjen e vet. Lulzim Basha shkeli statutin e partisë kur mori vendimin për të përjashtuar ish-liderin historik Sali Berisha pa marrë mendimin e anëtarësisë”, është shprehur Pack.
Ndër të tjera, Pack tha se lëvizja e Berishës është një drejtën e tij për të mbrojtur veten, duke fituar mbështetjen e demokratëve që besojnë se shpallja e tij “non -grata” nga SHBA është e pabazë. “Ai u keqtrajtua, duke u dëbuar nga grupi parlamentar, nga PD-ja dhe nga Parlamenti. Ndaj, nuk mund të jem kundër tij. Nuk jam pro nuk jam kundër. Mendoj se i takon anëtarëve të PD-së për të gjetur një zgjidhje”, është shprehur më tej Pack, e cila u ka sugjeruar demokratëve që të mbajnë një kuvend dhe të zgjidhin problemet me letra të hapura.
Discussion about this post