Lazio fitoi derbin e kryeqytetit duke mundur 1-0 Romën dhe duke u shkëputur me 5 pikë nga verdhekuqtë në garën për vendin e katërt në Serie A, që vlen edhe kualifikimin për në Champions League.
Në një atmosferë vërtetë lufte në “Olimpico” dhe jashtë tij, bardhekaltrit arritën të merrnin tri pikët. Çasti i parë vendimtare i ndeshjes ishte në të 32’, kur Ibanez u përjashtua pas dy të verdhash. Falë superioritetit numerik, skuadra e Sarrit nisi të dominonte ndeshjen, duke kërkuar me më shumë forca të çante murin e vendosur nga Mourinho.
Goli erdhi vetëm në të 65’, kur Mattia Zaccagni merr një pasim të saktë nga Felipe Anderson dhe nga pranë portës nuk gaboi. Kapiteni i kombëtares, Elseid Hysaj, luajti për 90 minuta, por nuk sfidoi dot në fushë Marash Kumbullën i cili mungonte për shkak të kartonit të kuq të marrë në ndeshjen e humbur kundër Sassuolos.
Pak para fundit të pjesës së parë pati edhe një moment tensioni mes lojtarëve dhe pjesëtarëve të stafit të të dy skuadrave që ishin në stol. Fillimisht janë verdhe kuqtë që protestojnë pasi Pedro nuk dërgon një top jashtë edhe pse Romagnoli ishte dëmtuar dhe kur spanjolli më në fund e largon topin sulmohet verbalisht nga përgatitësi atletik Nuno Santos. Më pas sherrit i bashkohen të gjithë nga stoli dhe gjithçka zgjat për disa minuta, duke u mbyllur me përjashtimit të Santos dhe përgatitësit atletik të Romës, Ianni.
Edhe jashtë stadiumit pati një luftë shashkash mes tifozëve të të dy skuadrave, si pasojë e të cilave mbeti i plagosur edhe një efektiv policie pranë stadiumit “Olimpico”. Për shmangien e sherreve dhe incidenteve ishin thërritur rreth 1000 efektivë.
Discussion about this post