Lefter Maliqi në KAS: Do bëj kallëzim edhe ndaj Celibashit

Ish-deputeti i Partisë Demokratike, Lefter Maliqi ishte këtë paradite në KAS për kërkesën e tij, që kryebashkiakut të Kuçovës, Kreshnik Hajdari t’i hiqet mandati. I shoqëruar nga dy avokatët e tij, Maliqi paraqiti kërkesën, e cila më parë u refuzua nga KQZ dhe Ilirjan Celibashi.

Pas seancës dëgjimore, jashtë ambjenteve të KAS, Maliqi dha një prononcim për mediat duke akuzuar Hajdarin për lidhje me oligarkun Salillari dhe i cili ka përfituar prej taksave të banorëve të Kuçovës, së bashku me Salillarin për t’u pasuruar.

Nga ana tjetër, Maliqi pretendon për heqje mandati pasi në formularin e deklarimit, Kreshnik Hajdari nuk ka deklaruar që ka qenë i dënuar më parë në Greqi.

Për këtë, Maliqi lajmëron se së shpejti do të kryejë edhe një kallëzim në SPAK për kryetarin e KQZ, Ilirjan Celibashi për shpërdorim detyre.

“Mua më kanë penguar të bëj kallëzim ndaj Celibashit. Por tani do kallëzoj edhe Celibashin. Në këto ditë, pasi në datën 10 është gjyqi për kallëzim të rremë ndaj Hajdarit, por kemi bërë edhe kallëzime të tjera për këtë peng të oligarkut Salillari. Nuk është ndonjë habi e madhe. Priteshin këto vendime gjysëm politike. Sepse kur lideri i PD vazhdon të jetë me një vendim antikushtetues në arrest hstëpie. Të gjithë e dinë që institucionet janë të kapura. Bashkë me avokatët do t’i shkojmë deri në fund. Edhe sot nuk erdhi por solli avokatin e vetë, pa letra pa gjë me duar në xhepa. Besoj dhe shpresoj që të gjithë këta që bëjnë biznes me taksat e qytetarëve të përgjigjen para drejtësisë.”, u shpreh ai.

KAS pranoi pjesërisht ankimimin e Partisë së Lirisë për vendimin e kryekomisionerit Ilirjan Celibashi që i la mandatin e kryetarit të Bashkisë së Kuçovës, Kreshnik Hajdarit.

Sipas vendimit të KAS, Kryekomisioneri do të shqyrtojë përsëri kërkesën për heqjen e mandatit të Kreshnik Hajdarit, i cili akuzohet nga opozita se ka fshehur një dënim të formës së prerë të marrë nga Gjyakata e Greqisë.

Në kërkesën e saj, Partia e Lirisë ka kërkuar heqjen e mandatit të Kreshnik Hajdarit pasi nuk ka deklaruar dënimin ne Greqi në formularin e dekriminalizimit.

Nga ana tjetër, Kreshnik Hajdari është nën hetim nga SPAK për falsifikim të formularit të dekriminalizimit.