Bashkia e Tiranë dhe Ministria e Drejtësisë kanë firmosur një marrëveshje të re, sipas së cilës të rinjtë që kapen nga Policia me një cigare hashash, nuk do të dërgohen në burg. Kjo marrëveshje tregon se po shkohet drejt legalizimit të kanabisit, opsion i cili është sjellë në qendër të vëmendjen nga kryeministri disa herë.
Ndërkohë, ditën e sotme në një deklaratë për mediat, Veliaj tha se të rinjtë që kapen me një cigare hashash duhet të ndihmohen, duke përmendur qendrën sociale në Kombinat, pasi sipas tij, janë psikologët dhe mentorët ata që transformojnë të rinjtë dhe jo gardianët e burgut. “Po flasim për një konsultim publik edhe për dekriminalizimin e hashashit. Shumica e shteteve të SHBA po e dekriminalizojnë. A ja vlen të mbushim burgjet për një cigare hashash me të rinjtë e Samiut e Petroninit? Kemi qendrën sociale në kombinat me një gamë shërbimesh, kurse për zanatet janë po ashtu fokusi ynë. Një psikolog ose mentor mund t’i transformojë jetën një të mituri, një gardian jo. E nisim ne në Tiranë, por duhet të na ndjekin bashkitë e tjera. S’jemi këtu për ata qe u ka ecur jeta. Jemi për ata që kanë patur një cedim apo problem”, tha ai.
Edhe ministri Ulsi Manja u shpreh se të rinjtë duhet të kenë mundësi të rehabilitohen dhe se një gabim nuk mund të vulosë gjithë jetën e tyre. Ai gjithashtu tha se marrëveshja me Veliajn është një urë e rëndësishme midis Ministrisë së Drejtësisë e bashkisë Tiranë për realizimin e masave alternative. Kujtojmë se pak javë më parë qeveria ka shpërndarë formularin për Këshillimin Kombëtar, në të cilin njëra nga pyetjet ishte nëse duhet të legalizohet kanabisi apo jo.
Discussion about this post