Legjenda e skuadrës së Milanit, Rud Gulit ka analizuar paraqitjet e kuqezinjve në këtë start kampionati ndërsa është ndalur edhe tek Zlatan Ibrahimovic i cili luan ende në nivele shumë të larta.
“Milani është më mirë në krahasim me dy vite më parë, kur kishte pak probleme. Më në fund klubi mori rrugën e duhur. Është e bukur të shohësh një Milan i cili lufton për vendet e para, është e rëndësishme. Kundër Liverpulit vuajti shpejtësinë e anglezëve. Por e rëndësishme është të kesh idenë si luhet në nivelet e larta.
Ajo ndeshje do të ndihmojë skuadrën që të rritë nivelin e saj. Me Ibran është gjithmonë e bukur, por kur nuk është ai, ka lojtarë të tjerë që e zëvendësojnë. A e meritonte një “Top të Artë”? Ka shumë lojtarë të nivelit të lartë, por për atë që po bën, është një lojtar i madh. Shpresoj që të fitojë një çmim vlerësimi për atë që ka bërë.
Haland? Për mua është i pabesueshëm, për gjatësinë që ka është i shpejtë dhe i zhdërvjellët. Është shumë i qetë para portës. E ndjek e gjithë Europa. Mund të bëhet një yll? Është që tani i tillë”, tha Gulit.
