Pas disa ditësh “sherr” me Dritan lelin, Shkëlqim Leskaj është shkarkuar zyrtarisht nga posti i Drejtorit të Ujësjellës Kanalizimeve Vlorë. Mesohet se Leskaj është çregjistruar dhe nga QKR.
Sot pranë zyrave të ujësjellësit është paraqitur drejtuesja e re e ujësjellësit Elona Hodaj, e cila është shoqëruar edhe nga policia private, por ndërhyrja e këtyre të fundit ka qenë e panevojshme për shkak se Leskaj është larguar vetë nga zyra.
Elona Hodaj është ish- drejtoresha e Kadastrës së Vlorës, e cila dha dorëheqjen kur ende nuk kishte mbushur një muaj në detyrë. Asokohe Kadastra e Vlorës ishte kthyer në një burim sherri dhe zonë e “minuar” pasi dy grupe të ndryshme pretendonin për pronësinë e një pronë në zonën e Jalës. Njëri nga grupet ka marrë vendimin se formës së prerë nga gjykata për këtë pronë, ndërsa Kadastra prej kohësh ka kërkuar pezullimin dhe duke favorizuar palën tjetër.
Nuk dihet nëse Hodaj u largua nga posti me dëshirë apo u detyrua të japë dorëheqjen, por Leli u sigurua që besniken e tij, ta emëronte në një tjetër post të rëndësishëm.
Por si nisi konflikti mes Lelit dhe Leskajt?
Konflikti mes Lelit dhe Leskajt nisi më 6 gusht, datë kur Shkëlqim Leskaj ka firmosur dorëheqjen nga detyra e drejtorit të Ujësjellësit të Vlorës. Por disa ditë më pas, Leskaj është penduar duke kërkuar që ta kthejë mbrapsht, por kryetari i bashkisë së Vlorës nuk e ka pranuar, duke i qëndruar vendimit të parë të drejtorit të UKV-së.
Por, Leskaj pavarësisht se dha dorëheqjen nuk mund të largohej në gusht pasi mori lejen vjetore dhe për këtë arsye është pritur data e rikthimit për t’i komunikuar procedurën. Në datë 15 shtator, drejtorit iu kërkua që të lironte zyrën, por Leskaj e ka refuzuar kërkesën duke mos pranuar madje duke e kyçur derën.
Para disa ditësh, “UKV” deklaroi për mediet se Shkëlqim Leskaj vijon që të jetë në krye të detyrës, dhe puna po ecën normalisht në qytetin bregdetar. Nuk dihet se çfarë ka ndodhur pasi ky i fundit ndryshoi mendim, por Dritan Lelit i del sërish e vetja.
