Kreu i Partisë Socialdemokrate (PSD), njëkohësisht dhe burri i ish-ministres së Arsimit në Shqipëri, Besa Shahinit, Dardan Molliqaj së bashku me të akuzuarin tjetër Fatos Sahiti kanë munguar në seancën e së mërkurës, çka ka sjellë dhe dështimin e gjykimit. Ata akuzohen për sulm fizik ndaj Haki Abazit pas një debati televiziv më 2019.
Në mungesë të prezencës së tyre gjykata ka lëshuar urdhërarrest. Në seancë mungoi edhe i dëmtuari Haki Abazi, për të cilin gjykatësja e rastit Vlora Pacolli-Rexhepi tha se gjykata ka pranuar një parashtresë, përmes së cilës i njëjti ka njoftuar se është i angazhuar jashtë vendit.
Në seancë e pranishme ishte avokatja e Abazit, Sadije Mjekiqi. Lidhur me mungesën e të akuzuarit Molliqaj, gjykatësja Pacolli-Rexhepi tha se gjykata pas pranimit të raportit nga Policia e Kosovës se ai nuk gjendej në adresën e dhënë, gjykata ka lëshuar urdhërarrest ndaj tij, i cili do të mbetet aktiv për një vit.
Në këto rrethana, seanca u shty në kohë të pacaktuar. Kurse për të akuzuarin Sahiti, gjykatësja tha se kanë lëshuar urdhëresë për sjellje me detyrim për këtë seancë, por nga Policia e Kosovës kanë pranuar një raport zyrtar se për të njëjtin është bërë verifikimi i adresës, mirëpo nuk kanë mundur që ta sigurojnë adresën e saktë.
Ndryshe, sipas aktakuzës së ngritur më 18 shkurt 2020 nga Prokuroria Themelore në Prishtinë, të pandehurit Dardan Molliqaj dhe Fatos Sahiti akuzohen se në bashkëkryerje kanë kryer veprën penale “Sulmi”.
Discussion about this post