Pas shumë hetimesh e shkarkimesh të zyrtarëve për zjarrin në spitalin e Tetovës, ku u shkaktuan 14 viktima, gjatë ditës së sotme dy hetues nga Gjermania kanë arritur në vendin e ngjarjes në përpjekje për të hedhur dritë mbi shkakun.
Bëhet fjalë per ekspert të shkallës më të lartë për ekspertiza dhe hetime gjatë fatkeqësive nga njësiti i kriminalistikës (BKA). Qëllimi i tyre është që të ndihmojnë në zbulimin dhe vërtetimin e shkaqeve të zjarrit që shpërtheu në spitalin modular në Tetovë.
Në detyrat speciale të cilat i punon BKA është edhe ekipi që punon në hetime me viktima në katastrofa dhe fatkeqësi.
Bëhet fjalë për institucion i cili në Gjermani ka një traditë 60 vjeçare të veprimit, me afro 7000 të punësuar, shkruan Alsat. Ekipi i ekspertëve do të bashkëpunoj me MPB-në dhe do ta ndihmojë hetimin që e udhëheq Prokuroria Themelore Publike.
