Policia e Lezhës ka arrestuar një 40-vjeçar të shpallur në kërkim kombëtar për një grabitje të 12 viteve më parë. Elton Gjini është dënuar për grabitjen e parave të një banke në vitin 2009, gjatë transportimit të tyre në postë.
Sipas njoftimit të policisë, “ky shtetas ishte shpallur në kërkim kombëtar, pasi Gjykata e Rrethit Gjyqësor Lezhë e ka dënuar me 12 vite burgim për veprën penale “Vjedhje me armë”, e kryer në bashkëpunim, ku nga ky dënim ka dhe 6 muaj pa kryer, ngjarje e ndodhur me 12.03.2009, ku kanë vjedhur me armë një sasi parash që trasportoheshin nga një bankë në postë”.
Elton Gjini është arrestuar dhe në vitin 2009 për këtë vepër penale, por ai u la i lirë në atë kohë nga drejtësia shqiptare. Në atë kohë, Gjini ka mohuar deri në fund të procesit se ka qenë autor apo bashkautor, madje ka hedhur poshtë provat e grupit hetimor për ngjarjen e 12 marsit të vitit 2009. Gjini akuzohet se ka bashkëpunuar me dy shokët e tij, Enver Diva dhe Florind Marku, të dy të dënuar më parë për grabitje me armë.
Materialet i kaluan Prokurorisë së Rrethit Gjyqësor Lezhë, për veprime të mëtejshme.
Njoftimi i policisë:
Vijon puna për kapjen e personave të shpallur në kërkim kombëtar. Bie në prangat e Policisë një 40-vjeçar i shpallur në kërkim për vepren penale “Vjedhje me armë ” , e kryer në bashkëpunim.
Shërbimet e Specializuara në e Drejtorinë Vendore të Policisë Lezhë, në bashkëpunim me Komisariatin e Policisë Lezhë, në vijim të punës për zbardhjen e plotë të ngjarjeve të ndodhura më parë dhe kapjen e personave të shpallur në kërkim, me qëllim vënien e tyre para përgjegjësisë ligjore, mbi bazën e informacioneve të siguruara në rrugë operative për vendndodhjen e një shtetasi në kërkim, organizuan punën duke bërë të mundur lokalizimin, kapjen dhe ndalimin e shtetasit: Elton Gjini, 40 vjeç, banues në Lezhë( me precedentë kriminal).
Ky shtetas, ishte shpallur në kërkim kombëtar, pasi Gjykata e Rrethit Gjyqësor Lezhë e ka dënuar me 12 vite burgim për veprën penale “Vjedhje me armë” , e kryer në bashkëpunim, ku nga ky dënim ka dhe 6 muaj pa kryer, ngjarje e ndodhur me 12.03.2009, ku kanë vjedhur me armë një sasi parash që trasportoheshin nga një bankë në postë.
Materialet i kaluan Prokurorisë së Rrethit Gjyqësor Lezhë, për veprime të mëtejshme.
