Aktori i njohur Liam Neeson ka reaguar publikisht për të sqaruar qëndrimin e tij ndaj vaksinave, pas polemikave të krijuara nga përfshirja e tij si narrator në dokumentarin kontrovers “Plague of Corruption: 80 Years of Pharmaceutical Corruption Exposed”. Përmes një deklarate zyrtare të dhënë për PEOPLE nga përfaqësuesi i tij, aktori 73-vjeçar thekson se nuk ka qenë dhe nuk është kurrë kundër vaksinimit.
“Ne të gjithë e pranojmë se mund të ketë korrupsion në industrinë farmaceutike, por kjo nuk duhet të ngatërrohet kurrë me kundërshtimin ndaj vaksinave”, thuhet në deklaratë.
Më tej sqarohet se Neeson ka një histori të gjatë mbështetjeje për shëndetin publik, e dëshmuar edhe nga angazhimi i tij si Ambasador i Vullnetit të Mirë i UNICEF-it, ku ka promovuar vazhdimisht vaksinimin universal.
“Liam nuk e ka formësuar përmbajtjen editoriale të filmit dhe çdo pyetje mbi mesazhet apo pretendimet e dokumentarit duhet t’u drejtohet producentëve”, nënvizon përfaqësuesi i aktorit.
Dokumentari në fjalë bazohet në librin e vitit 2021 me të njëjtin titull, të shkruar nga Judy Mikowitz dhe Kent Heckenlively figura të njohura për qëndrime të forta kundër vaksinimit, veçanërisht gjatë pandemisë COVID-19. Filmi përfshin gjithashtu intervista me Sekretarin e Shëndetësisë Robert F. Kennedy Jr. dhe vlerëson ish-presidentin Donald Trump, të cilët kanë promovuar teori të hedhura poshtë nga komuniteti shkencor për sigurinë e vaksinave.
Pavarësisht spekulimeve, Neeson ka folur vazhdimisht në favor të vaksinave. Në vitin 2022, ai i quajti ato “një histori të jashtëzakonshme suksesi njerëzor”, duke theksuar se miliarda fëmijë janë vaksinuar falë përpjekjeve të përbashkëta të shkencëtarëve, punonjësve të shëndetësisë dhe vullnetarëve në mbarë botën.
“Diskutimi për vaksinat vitet e fundit ka lënë në hije sa shumë të mira kanë bërë ato për secilin prej nesh. Është një nga arritjet më të mëdha kolektive në historinë e njerëzimit”, është shprehur aktori.
Discussion about this post