Lideri Suprem i Iranit, Ajetollahu Ali Khamenei, ka reaguar për herë të parë që pas arritjes së armëpushimit me Izraelin pas 12 ditëve luftime.
Ali Khamenei deklaroi në një postim në rrjetin social X, se vendi i tij “i dha një shuplakë të rëndë SHBA-ve”, duke se Shtetet e Bashkuara “nuk arritën asnjë sukses” kur vendosën të përfshihen drejtpërdrejt në konflikt përkrah Izraelit kundër Teheranit.
“Regjimi amerikan u përfshi drejtpërdrejt në luftë, sepse e ndjeu se nëse nuk ndërhynte, regjimi sionist do të shkatërrohej plotësisht. Ata u përfshinë për ta shpëtuar, por nuk arritën asgjë,” tha Khamenei.
Ai shtoi se Republika Islamike e Iranit sulmoi dhe dëmtoi bazën ajrore Al-Udeid në Katar, një nga bazat më të rëndësishme amerikane në rajon, duke e cilësuar këtë si një “shuplakë të rëndë” ndaj SHBA-ve.
Ky sulm u konsiderua nga SHBA si një përgjigje ndaj bombardimeve që kishte kryer mbi objektiva bërthamore iraniane gjatë fundjavës, por pa synuar përshkallëzim të mëtejshëm të konfliktit.
Presidenti amerikan Donald Trump e cilësoi sulmin iranian si “shumë të dobët” dhe deklaroi se 13 nga 14 raketat e lëshuara ishin interceptuar.
Në reagimin e tij, Ajatollah Khamenei paralajmëroi se Irani ka qasje ndaj bazave kyçe amerikane në rajon dhe se mund të ndërmarrë veprime “kurdo që e konsideron të nevojshme”.
“Fakti që Republika Islamike ka qasje në qendra kyçe të SHBA-ve në rajon dhe mund të veprojë në çdo moment që e sheh të arsyeshme, është shumë domethënëse,” tha ai.
Khamenei shtoi gjithashtu se çdo akt agresioni ndaj Iranit do të sillte një “kosto të rëndë” për SHBA-të, duke lënë të hapur mundësinë për sulme të përsëritura në të ardhmen.
Discussion about this post