Sot në orën 17:00 në Sheshin Skënderbej do të zhvillohet protesta në mbrojtje të ish-krerëve të UÇK-së, Hashim Thaçi, Kadri Veseli, Jakup Krasniqi dhe Rexhep Selimi të cilët po gjykohen në Hagë të akuzuar për krime lufte.
“Drejtësi për Çlirimtarët” është slogani i kësaj proteste e cila pritet të mbledhë qytetarët nga Shqipëria dhe Kosova.
Në këtë protestë do të mbajë fjalë ish-presidenti Alfred Moisiu dhe kryetari i BDI-së, Ali Ahmeti. Nga Kosova drejt Tiranës do të nisen 60 autobusë.
Për këtë protestë, Ministria e Infrastrukturës dhe Energjisë ka bërë me dije se për 24 orë nuk do të paguhet tarifa në Rrugën e Kombit.
Presidentja e Kosovës, Vjosa Osmani, ka dalë në mbështetje të protestës. Në një konferencë për media, Osmani theksoi se lufta e Ushtrisë Çlirimtare të Kosovës ka qenë e drejtë.
Përparim Rama, kryetari i Bashkisë së Prishtinës, dhe Lutfi Haziri, një nga drejtuesit kryesorë të LDK-së, do t’i bashkohen po ashtu protestës që do të mbahet në Tiranë.
Kryebashkiaku Rama ka njoftuar se ka nënshkruar një shkresë, e cila mundëson transport falas për të gjithë veteranët e Ushtrisë Çlirimtare të Kosovës, që do të protestojnë në Tiranë.
Nga ana tjetër deputetët e mazhorancës në Tiranë kanë bërë me dije se do të jenë pjesë e protestës, ndërsa opozita nuk do të marrë pjesë, disktutime të cilat u bënë një ditë më parë në Kuvend.
Vetë kryeministri Edi Rama deklaroi se do të merrte pjesë në protestë po të mos politizohej çështja, ndërsa nga krahu tjetër Lëvizja Vetëvendosja tha se nuk është e nevojshme të mbushen sheshet por të flitet në forumet ndërkombëtare, aty ku flet diplomacia
Prej 3 prilli të vitit 2023, në Gjykatën Speciale në Hagë po zhvillohet procesi kryesor ndaj ish-presidentit Hashim Thaçi, ish-kryeparlamentarëve Kadri Veseli e Jakup Krasniqi dhe ish-deputetit Rexhep Selimi, të akuzuar për krime lufte dhe krime kundër njerëzimit, akuza që të katërt i kanë mohuar.
Discussion about this post