Gjykata e Kukësit ka ndryshuar ditën e sotme masën e sigurisë për 21-vjeçaren Artjola Sallahu, duke i ndryshuar masën e sigurisë nga “arrest me burg” në “arrest shtëpie”.
Ajo u arrestua dy ditë më parë, pasi dhunoi me sende të forta çiftin e bashkëshortëve Agim Jaku, 65 vjeç dhe Vera Jaku, 60 vjeçe, të cilët mbetën të plagosur dhe përfunduan në spital. Ngjarja ndodhi në fshatin Pla të Hasit.
Mbi të rëndojnë akuzat për veprat penale “Plagosja e rëndë me dashje” dhe “Plagosja e lehtë me dashje”, pasi Agim Jaku mori mjekim dhe është jashtë rrezikut për jetën, ndërsa bashkëshortja e tij Vera Jaku vijon të jetë ende në kujdesin e mjekëve.
Konflikti mes tyre ishte për çështje pronësie, më konkretisht për shkak të një rruge që kishte hapur njëra familje dhe që prekte pronën e familjes tjetër.
Dhunimi i Agim dhe Vera Jakut, nxiti djalin e tyre 41-vjeçarin Ylber Jaku për t’u kthyer nga Britania e Madhe dhe për t’u hakmarrë ndaj dhunimit të prindërve të tij. Pasditen e djeshme ai ekzekutoi me pushkë vëllain e Artjola Sallahut, 34-vjeçarin Ryshyt Sallahu.
Pas krimit ai u arrestua, teksa u sekuestrua edhe arma e krimit. Mësohet se konfliktet për pronën mes familjes Jaku dhe Sallahu vijojnë prej mbi 10 vitesh, teksa familja Jaku ka bërë mbi 20 kallëzime ndër vite për konfliktin. Kallëzimet janë bere nga Agim Jaku, babai i autorit të vrasjes, i cili u kërkonte institucioneve zgjidhjen e konfliktit
Discussion about this post