I konsideruar si i dënuari i parë VIP, Adriatik Llalla për 5 vite mbajti postin e Kryeprokurorit, por do të mbahet mend si prokurori që nuk dërgoi asnjë zyrtar para drejtësisë edhe pse dosjet në zyrën e tij ishin me dhjetëra.
Pasi u largua nga detyra, ndaj tij nisi një hetim për disa vepra penale, por që në fund përfundoi në gjykatë për fshehje dhe mosdeklarim pasurie. Prej më shumë se dy vitesh beteje me prokurorinë dhe gjykata, sot Llalla u dënua nga Apeli i Posaçëm me dy vite burg dhe konfiskim të pasurive, lënie në fuqi të vendimit të Shkallës së Parë.
Këtë rrezik ish-kryeprokurori e ka ndierë që në çelje të hetimeve për skandal-korrupsion, ndërsa lëvizjet e tij të fundit vërtetojnë se SPAK që shihet me skepticizëm, ka goditur shkelësit e vërtetë të ligjit.
Pas vendimit nga gjykata për urdhër-arrest, policia ka shkuar ta arrestojë në shtëpi ish-kryeprokurorin.
Uniformat blu kanë hapur derën e banesës në Tiranë e cila fillimisht ishte e mbyllur. Ndërsa gjatë kontrollit nuk është gjendur askush. Theksojmë se jo më pak se një orë më parë, jashtë banesës është fotografuar edhe bashkëshortja e tij me djalin.
Teksa policia pret gjetjen e kryeprokurorit edhe bashkëshortja e tij ka marrë arratinë.
Deri tani dyshimet janë se ish-kryeprokurori mund të jetë arratisur drejt Italisë, pasi disa fotove që qarkulluan në media ku ai është parë duke pritur në një stacion treni në Romë.
Ky dyshim erdhi si “bombë” për organet ligjvënëse të cilat, pasi Llalla mesa duket ka përgënjeshtruar dëshminë e dhënë para togave të zeza, ku prej një jave kërkoi të largohej jashtë vendit për t’u mjekuar në një klinikë private në Turqi.
Për këtë të dhënë ka reaguar edhe avokati i Lallës: Unë isha në gjykatën e Apelit dhe shtrova pretendimet e mia për mbrojtjen ligjore. Klienti im ndodhet aktualisht në regjim spitalor.
Theksojmë se nëse nuk paraqitet pas lënies në fuqi të vendimit, ndaj ish kryeprokurorit mund të shpallet urdhër kërkimi ndërkombëtar. / A.L gijotina.com /
