Mëngjesin i sotëm e ka gjetur Ilir Metën të lirë nga postet zyrtare. Nga sot, Meta nuk është më President i Republikës së Shqipërisë, pasi dorëzoi dje Presidencën te pasuesi i tij, kreu i ri i shtetit, Bajram Begaj.
I cilësuar se “kostumi i presidentit i rrinte ngushtë”, sikurse e ka paralajmëruar e sotmja do të jetë një rikthim i ri për të. “Do të rikthehem me vrull djaloshar”, do të thoshte Meta pak kohë më parë.
Dhe duket se LSI, partia që themeloi, është bërë gati për rikthimin e tij pas pesë vitesh. Ndërkohë, që Meta drejtonte Presidencën në një mandat të pazakontë për të, LSI-në ia besoi, bashkëshortes, Monika Kryemadhit, e cila refuzoi që në fillim që të ushtronte funksionin e Zonjës së Parë.
Meta ka bërë të ditur se do t’i rikthehet politikës aktive, për t’u përballur nga drejtimi i një partie opozitare me Edi Ramën. LSI mban sot Konventën Kombëtare. Funksionarët e partisë janë shprehur se rikthimi i Metës është i nevojshëm për vetë LSI-në, por edhe opozitën.
Konventa do të shënojë nisjen e procesit për ristrukturimin e LSI për t’u bërë gati për zgjedhjet lokale. Gjithashtu mbetet për t’u parë sesi do të jetë bashkëpunimi I Ilir Metës me Sali Berishën, që duket se do të krijojnë një front të përbashkët opozitar.
Discussion about this post