Lëvizja Socialiste për Integrim i ka kërkuar informacion SPAK në lidhje me denoncimet që kjo forcë politike ka depozituar për skandalin e inceneratorit të Tiranës.
LSI kërkon të dijë nëse SPAK ka nisur hetimet për Erion Veliajn, Ëngjëll Agacin, Lefter Kokën dhe Alqin Bllakon për rolin e tyre në ndërtimin e inceneratorit të Tiranës.
“Të nderuar Prokurorë të Prokurorisë së Posaçme, Lëvizja Socialiste për Integrim, në datë 04.03.2021 ka depozituar një kallëzim penal në Strukturën e Posaçme Kundër Korrupsionit dhe Krimit të Organizuar (SPAK), ndaj: Kryetarit të Bashkisë Tiranë, Z. ERION VELIAJ; Sekretarit të Përgjithshëm të Këshillit të Ministrave, Z. ËNGJËLL AGAÇI; Titullarit të Autoritetit Kontraktor, Ish Ministrit të Mjedisit, Z. LEFTER KOKA; Ish Sekretarit të Përgjithshëm të Ministrisë së Mjedisit, Z. ALQI BLLAKO; Komisionit të Dhënies me Koncesion për projektin “Për Ndërtim Landfilli, Inceneratori dhe Rehabilitim i Venddepozitimeve Ekzistuese Tiranë dhe Prodhimin e Energjisë Elektrike”, shkruhet në njoftim.
Gjithashtu, LSi kërkon informacion lidhur me: 1) Statusin Juridik të procedimit penal; 2) Pa cënuar parimin e sekretit hetimor, aktet dhe provat e administruara nga Prokuroria si dhe informacion lidhur me personat që po hetohen nga Prokuroria dhe statusin penal që i atribuohet personave që po hetohen; 3) Nëse ka persona që kanë status penal “nën hetim” apo “të pandehur”, kërkojmë informacion lidhur me masat konkrete të sigurisë që janë marrë nga Prokurori i çështjes.
Ndërsa rikujton se afati maksimal i parashikuar nga neni 323 dhe 324 i Kodit të Procedurës Penale, për përfundimin e hetimeve është 2 vjet.
Discussion about this post