Deputeti i Partisë Demokratike, Luçiano Boçi, me anë të një statusi në Facebook, ku vijon të adresojë problematikat që ka arsimi në vendin tonë, ka shkruar se klasat kolektive vazhdojnë të jenë “gangrenë” për arsimin tonë.
Ai tregon se PS nuk e ka mbajtur premtimin e tyre në fushatë për moskrijimin e klasave kolektive, pasi sipas tij sot nxënësit e mësuesit janë brenda tyre në Leskovik. Ai është ndalur konkretisht te klasat kolektive në Leskovik, pasi shkruan se sipas tij “700 milionë lek investim për shkollën, shkuan dëm”.
“Klasat kolektive vazhdojnë të jenë gangrenë në arsimin tonë. Mungesa e strategjive, angazhimeve dhe paaftësia po i shtojnë ato çdo ditë. Kjo ka ndodhur dhe në një nga trevat më arsimdashëse në Kolonjë, njësinë administrative Leskovik. Në shkollën kryesore “Jani Vreto”, shtohen klasat kolektive. Dhe kjo ndodh vetëm për një nxënës më pak, duke i dorëzuar të tjerët drejt një mësimdhënie kaotike, me tema të përziera e me mësuesë ndonëse të mirë, të pa mësuar me mësim kolektiv. Megjithëse shkolla është e investuar, me klasa e hapësira, ngjan që ato 700 milion lekë të hedhura po shkojnë dëm”- shkruan Luçiono Boçi.
Gjatë shkrimit të tij, duke treguar të gjitha problematikat që ka arsimi sot, që nga mësimi me turne deri tek ambientet e pasigurta, ai vë në dyshim rolin e kryeministrit të Shqipërisë, Edi Rama, duke ironizuar: “Ndërsa Rama çfarë bën? Na tregon me gisht satelitët!!!????”
“Fatkeqësisht ky është arsimi sot: Me braktisje masive. Me diskriminim të shtuar arsimor. Me klasa kolektive diku. Me klasa të mbipopulluara diku tjetër. Me mësim me turne. Me ambiente të pasigurta. Me shkolla të investuara kuturu. Me shkolla të amortizuara në pjesën dërmuese. Me një arsimim fiktiv që më shumë se dijen po shpërndan injorancën. Ndërsa Rama çfarë bën? Na tregon me gisht satelitët!!!????”- shkruan Luçiano Boçi
Gjithashtu, Boçi u shpreh se prindërit, këtë gjë “e shohin si hakmarrje politike të rezultatit zgjedhor të gjithë këtë katrahurë me fëmijët e tyre.”
