Lufta në Ukrainë/ Klosi: Rusët janë të çmendur, rrezikon edhe Shqipëria

Drejtor i Agjencisë Kombëtare Bërthamore, Fatos Klosi ka folur sot për luftën ruse në Ukrainë. Paralajmërimet e tij për agravim të situatës janë të frikshëm dhe në rrethin e të rrezikuarve futet edhe vendi ynë.  Ai tha qe nëse shpërthen një luftë bërthamore rrezikohen brezat e ardhshëm dhe pasojat zgjasin deri në 100 mijë vjet. Klosi tha se, Ukrainë pas ca kohësh nuk mund t’i bëjë më ballë e vetme Rusisë prandaj po kërkon ndërhyrjen e NATOS, pjesë e të cilës është edhe Shqipëria, duke theksuar se kështu do të nxitet një Luftë e III Botërore.

“Ukraina po mundohet pak të dramatizojë këtë gjë sepse ka nevojë që shtetet e tjera t’i vijnë në ndihmë. E kanë të vështirë të përballen me rusët që kanë më tepër armatime. Prandaj Ukraina po kërkon të anëtarësohet edhe në NATO. Nuk e pësojnë vetëm brezat e sotshëm por edhe ata të ardhshëm. Rusët e kanë llogaritur në mënyrë idiote, të bësh sulm për ato çështje që ato kanë menduar, është gabim. Por një central bërthamor është tjetër gjë. Duhet menduar se çfarë mund të ndodhë për qindra vitet e ardhshme. Të mendosh atë që po ndodh në Çernobil edhe Japoni. Në Japoni janë larguar rreth 50 mijë vetë nga shtëpitë e tyre. Pra janë fatkeqësi që zgjasin shumë dhe me pasoja shumë të mëdha për njerëzit. Pra ata që planifikojnë këto gjëra duhet të konsiderohen si të çmendur”, u shpreh Kosi.

Ndërsa e krahasoi planin e Rusisë për shpërthimet bërthamore të ngjashëm me atë të  Hiroshimës.  Gjithsesi, sipas tij Putin po mundohet të tremë Ukrainën.

“Për luftë nukleare janë përgatitur shumë shtete. Njerëzimi u bind që bombat bërthamore janë vdekjeprurëse në shembullin e Hiroshimës ku vdiqën qindra mijëra persona. Kapaciteti i këtyre bombave bërthamore sot është shumë më i madh se i bombës që goditi Hiroshimën. Në luftë nuk përdoren këto armë sepse asnjëri nuk do shpëtonte nga sulmet e njëpasnjëshme. Të paktën për këta 3 të mëdhenjtë, e kanë të qartë se nëse do fillohej të përdoreshin bombat bërthamore do ishte vetë fundi i tyre. Ata që janë thënë nga Putin, janë vetëm fjalë për t’i trembur ukrainasit dhe perëndimorët. Janë vetëm kërcënuese”, tha Klosi.

Sa i përket pasojave që mund të sjellë një sulm bërthamor, Klosi tha se rrezja e shkatërrimit do të ishte në 10 kilometra ndërsa shtoi se pasojat do të zgjeroheshin në sajë të atmosferës që përhapte ajrin.