Presidenti ukrainas Volodymyr Zelensky në një video-mesazh të ri të premten në mëngjes, kërkoi rezistencë ndaj pushtimit rus dhe kritikoi aleatët e Ukrainës për herë të dytë në vetëm pak orë. Zelensky në hapje të fjalimit tha se ky është mëngjesi i dytë i luftës gjithëpërfshirëse.
“Këtë mëngjes, ne po mbrojmë vendin tonë të vetëm. Ashtu si dje, vendet më të fuqishme në botë, po shikojnë nga larg. Rusia u godit me sanksione dje, por këto nuk janë të mjaftueshme për të larguar këto trupa të huaja nga toka jonë”, tha ai në një video në Facebook.
Zelensky shtoi se populli ukrainas po vazhdon të rezistojë, “duke demonstruar heroizëm të vërtetë. Armiku u ndalua në shumicën e drejtimeve. Ka luftime që po zhvillohen … Ne nuk do të lodhemi. Në orën 4 të mëngjesit, forcat ruse vazhduan të lëshonin sulme me raketa në territorin e Ukrainës. Ata thonë se kanë në shënjestër vetëm objektet ushtarake, por këto janë gënjeshtra. Në fakt, ata nuk e dallojnë se ku veprojnë”, tha Zelensky.
Kryetari i bashkisë së Kievit Vitali Klitschko tha në një postim në Twitter të premten në mëngjes se tre persona u plagosën, njëri prej të cilëve është në gjendje kritike si rezultat i një rrënoje që goditi ndërtesën e banimit 7-A në rrugën Koshitsya.
Discussion about this post