Kryesia e Partisë Demokratike në Fier ka zhvilluar një mbledhje, ku deputeti i PD Luan Baçi, është shprehur se mbrëmjen e djeshme është takuar me kryetarin e Partisë Demokratike, Lulzim Basha.
Në mbledhje Baçi është shprehur se Basha i ka propozuar një emër të ri për kryetar të PD në Fier, por që nuk është pranuar nga ai. Baçi thotë se e ka kontestuar me arsyen e procedurës, pasi largimi i tij nga drejtimi i PD-së në Fier, nuk është bërë me vendim zyrtar.
“Kisha një takim mbrëmë në orën kisha 19:00, 10 minuta me kryetarin Basha ku më është thënë të japë propozime për degën e Fierit dhe më është kërkuar dakordësia. Kontestojë mënyrën se si procedohet. Nuk ka asnjë vendim zyrtar që të ketë ardhur për pezullimin tim. Jam i mendimit që duhet të qarkullojnë drejtuesit por duhet të bëhet në mënyrën e duhur” – është shprehur Baçi.
Kujtojmë që Baçi kishte paraqitur dorëheqjen muaj më parë për shkak se kandidoi për deputet në zgjedhjet e 25 prillit, por ai vijonte të mbante funksionet e Kryetarit, pasi nuk ishte caktuar apo deleguar asnjë emër tjetër. Ndërkohë sot u bë me dije se Agron Kapllanaj është komanduar si Kryetar i degës së PD-së në Fier, deri në ristrukturimin e kësaj dege.
Në lidhje me këtë veprim, ka reaguar edhe deputeti Flamur Noka, i cili e ka quajtur këtë si një hakmarrje e Bashës ndaj Baçit, pasi ky i fundit iu bashkua foltores së Berishës.
