Bruno Lulaj ishte një nga lojtarët më të mirë të Tiranës në sfidën ndaj Beshiktashit të Stambollit. Menjëherë pas takimit lojtari foli për ndeshjen duke falënderuar Shehin që i dha mundësi të luante titular, në takimin e vlefshëm për turin e dytë kualifikues të Europa Conference League.
Lulaj analizoi të gjithë sfidën e zhvilluar të enjten në “Arenën Kombëtare”, teksa pranoi se gjërat u vendosën nga episodet. Gjithsesi, mbrojtësi tha se tani radhën e ka kampionati.
Si e vlerësoni ndeshjen me Beshiktashin dhe çfarë mund të bënit më mirë?
Bëmë një ndeshje shumë të mirë ndaj një kundërshtari që njihet dhe dihen kualitetet e tij. Një diferencë shumë e madhe në buxhet, por në fushë nuk është se u duk dhe nuk ishte e tillë diferenca. Jam krenar për ekipin dhe atë që shfaqi në fushën e lojës.
Kjo ishte forca e Tiranës apo sfidën e vendosi fati?
Kishim punuar gjatë gjithë javës dhe dhamë maksimumin. Nuk ia dolëm. Edhe lodhja bëri të vetën. Në pjesën e dytë u ndëshkuam me episode, por besoj se ishte një sfidë shumë e mirë.
Lulaj në këtë ndeshje luajti titullar. Një surprizë për kundërshtarin meqë në Stamboll luajtët mirë?
Zgjedhja ishte e profesorit. Kjo e kushtëzuar për faktin që edhe në Stamboll na shkoi shumë mirë. Pati besim te kjo skemë dhe besoj se edhe ai është i kënaqur.
Gjithsesi, Tirana mund të shkonte në fazën e grupeve, por fati i vuri përballë Beshiktashin. Do t’ia dilte?
Kam besim shumë te kjo skuadër, te këta lojtarë që janë cilësorë. Me bindje them se ne do të kishim kapur “play off”-in minimalisht apo grupet.
Tani nis një luftë e gjatë për të fituar titullin kampion këtë sezon në Superiore?
Maratona është e gjatë. Ne jemi këtu dhe do të luftojmë për t’i fituar të dy trofetë. Treguam potencialin tonë. Do të luajmë për gjithçka./PanoramaSport
Discussion about this post