Trajneri i skuadrës së Egnatias, Gugash Magani analizoi performancën e rrogozhinasve ndaj Partizanit ku u larguan nga kryeqyteti me një pikë. Ai theksoi se Partizani mund të shënonte golin e tre pikëve ndërsa u ndal tek forma e sulmuesit Pedro.
“Ne futemi në çdo ndeshje për të fituar, edhe pse shkalla e vështirësisë ishte e lartë. Partizani është emër i madh dhe kjo nuk diskutohet, por për më tepër, ata kishin edhe një motivim të jashtëzakonshëm, pasi nuk po kalonin moment të mirë.
Patëm fat në rastin e golit, ndërsa më pas ata na morën shumë terren dhe mund të kishin shënuar edhe më herët. Në pjesën e dytë kemi qenë më mirë, pasi bëmë ndërrimet e duhura, duke qenë se kemi pasur shumë dëmtime në këto javë të para.
Pedro ka pasur një inflamacion në gjurin e djathtë, që kur erdhi nga Brazili dhe ndaj vetëm në minutat e fundit vendosa ta aktivizoj. Bëri shumë sakrificë që luajti, por sot nuk ishte në lartësinë e duhur për shkak të dëmtimit”, tha Magani.
