Ish-Presidenti Bujar Nishani ka hedhur akuza ndaj qeverisë, për makinën që përdor kryeministri Edi Rama. Ai shprehet se vetëm pas denoncimit në media qeveria tentoi të justifikohet se makinën e ka marrë Partia Socialiste me qira.
“Një skandal tjetër i qeverisë së skandaleve. Baza e skandalit hajnia dhe mashtrimi. Një gazetare e pakapur, denoncoi Edi Ramën se përdorte prej muajsh një makinë ultra luksoze që sipas medias kushtonte 500 mijë euro gjysmë milioni pra. Vetëm pas denoncimit të medias, qeveria tentoi të justifikohet se makinën e ka marrë Partia Socialiste me qira. Ky është një skandal i radhës kuptohet që ngado ta kapësh të bën pis” – ka shkruar Nishani në rrjete sociale.
Për këtë skandal, Nishani bën fajtor edhe kreun e opozitës, Lulzim Basha, pasi sipas tij opozita nuk duhet të hesht. Më tej ai shkruan se denoncimi i aferave qeveritare nuk është më as monopol e as peng i kryetarit peng në selinë e PD.
“Por selia e Partisë Demokratike pse hesht? Ka frikë? Nuk e quan të rëndësishme ? Nuk ka dëgjuar e parë gjë? Apo? Gjithsesi opozitarizmi, denoncimi i aferave qeveritare, përballja me të keqen nuk është më as monopol e as peng i Kryetarit Peng në selinë e PD”- shkruan më tej Nishani.
Sipas Nishanit, kryeministri i vendit nuk mundet të marrë e as të përdorë makina nga Partia Socialiste. Në punët si kryetar i saj, ai mund të përdorë çdo gjë të PS. Zyra, makina, njerëz, të partisë por jo në Qeveri e jo në qeverisje.
Dhe për këtë Nishani thotë se meqenëse PS e mori përsipër ta mbulojë skandalin e Edi Ramës, duhej që t’u tregonte shqiptarëve se sa kushton qiraja e paguar, të bënte publike kontratën e nënshkruar, të nxirrte transaksionin e thesarit të shtetit për pagesën e realizuar, të sqaronte burimin e parave që partia ka shfrytëzuar.
