Makina përplaset me motorin, plagoset çifti i të moshuarve në Shkodër

Aksident me pasojë dy persona të plagosur është regjistruar mëngjesin e kësaj të marte në Shkodër.

Ngjarja ka ndodhur rreth orës 09:00, në lagjen “Tre heronjtë”, ku shtetasja E. R., 34 vjeçe, me automjetin që drejtonte, ka përplasur motomjetin me drejtues shtetasin N. M., 77 vjeç, dhe pasagjere bashkëshorten e tij, shtetasen L. M., 73 vjeçe.

Si pasojë e përplasjes janë dëmtuar dy bashkëshortët, të cilët po marrin ndihmë mjekësore në spital, ku fatmirësisht janë jashtë rrezikut për jetën, njoftoi policia.

Policia dhe grupi hetimor në vendngjarje po punon për sqarimin e plotë të rrethanave të këtij aksidenti, shtuan të njëjtat burime.