Tre javë pasi u emërua në krye të kompanisë “Albcontrol” me vendim të Këshillit të Ministrave, Maksim Et’hemaj bën tenderin marramendës prej 850 milionë lekëve të reja. Në datën 9 dhjetor, Albcontrol ka njoftuar Agjencinë e Prokurimit Publik për bërjen e një tenderi të ri. Ky tender mban numrin e REF-14628-12-09-2021, me objekt pastrimin e ambienteve të “Albcontrol”, me afat 36 muaj, pra për 3 vite. Ky tender, siç e thamë më sipër, ka fondin limit prej 84,175,068 lekë të reja, ose rreth 850 milionë lekë të vjetra.
Pra, me një llogari të thjesht, për 1 vit i bie rreth 280 milionë lekë të vjetra, që Maksim Et’hemaj do t’i marrë nga taksat e shqiptarëve, vetëm për të pastruar godinën ku punon. Në fakt, kaq shpenzojnë qytete si Berati, Lushnja apo Peshkopia për pastrimin e qytetit. Por, kaq po shpenzon Albcontrol, me qëllim që punonjësit që marrin një rrogë mesatare 3 mijë euro në muaj të qëndrojnë pastër. Kjo është një nga ato procedura e zakonshme që ngre dyshime se mund të bëhet për interesa personale, pasi me një shumë kaq të madhe lekësh vetëm për pastrim zyrash, mund ta bëj vetëm “Pentagoni” në SHBA.
Këtë dyshim e ngre edhe një ankesë që ka mbërritur në Komisionin të Prokurimit Publik, nga një operator ekonomik, i cili kërkon që të marrë pjesë në garën për këtë tender. Në ankesën e saj, kompania “GREEN ENERGY” SHPK, shprehet se kriteret që janë vënë për kompanitë në këtë tender, janë në shkelje të ligjeve, pasi kërkohen licenca që ligji shqiptar nuk i kërkon. Kur në procedura futen kritere që nuk i parashikon as ligji shqiptar, bëhen në ato raste kur autoriteti kontraktor, ose drejtuesi i institucionit e ka paracaktuar kompaninë që do ta fitojë tenderin.
Siç duket Et’hemaj do të ndjek të njëjtën mënyrë si paraardhësja e tij Edlira Kraja, kur në nëntor për të njëjtën arsye, për pastrimin e zyrave, bëri një tender me rreth 1.3 miliardë të vjetra. Me këto shifra, kompania në varësi të Ministrisë së Financave dhe Ekonomisë, me gojën plotë mund të quhet një lavatriçe parash.
Gijotina.com
Discussion about this post