Mali i Zi i ka nisur në mënyrën më të mirë të mundshme kualifikueset e Europanit, teksa ditën e sotme mposhti Bullgarinë në transfertë me rezultatin 0-1, në duelin e vlefshëm për grupin G.
Goli i Krstoviç, në minutën e 70-të i dhuroi 3 pikë të arta përfaqësueses së trajnerit Kljajeviç, që duket se këtë edicion të kualifikueseve të Europianit, do të rivalizojë fuqishëm me Hungarinë dhe Serbinë për 2 bileta në Gjermani EURO 2024.
Malazezët ishin dominues thuajse në të gjithë duelin, duke vendosur diktatin në fushën bullgare. Vlen të theksohet fakti se në stol në këtë duel ishte dhe sulmuesi me origjinë shqiptare, Driton Camaj, i cili nuk mori minuta. 26-vjeçari është pjesë e Kisvardës në Hungari.
Në sfidën e radhës Mali i Zi do të pres Serbinë në shtëpi. Në rast të një tjetër rezultati pozitiv, atëherë shanset e përfaqësueses malazeze për në Europian do të rriteshin ndjeshëm.
Discussion about this post