Policia e Maliqit ka vënë në pranga tre shtetas, pasi u kapën në flagrancë gjatë natës, duke kryer gjueti të paligjshme, në kundërshtim me moratoriumin për mbrojtjen e faunës së egër.
Sipas njoftimit zyrtar të Policisë, në vendin e ngjarjes është gjetur një kafshë e egër e vrarë me armë gjahu, si dhe është sekuestruar një armë gjahu, e cila përdorej nga të arrestuarit. Përveç sekuestrimit të armës, është marrë edhe masa e heqjes së lejes për mbajtjen e saj.
“Në kuadër të planit të masave për parandalimin dhe goditjen e veprimtarive të paligjshme të gjuetisë dhe të prerjes së pyjeve, Policia e Maliqit arrestoi tre persona që po kryenin gjueti të ndaluar gjatë natës,” thuhet në njoftimin e policisë.
Ndaj tyre është nisur procedimi penal, ndërkohë që hetimet vijojnë për të identifikuar nëse ka raste të tjera të përsëritura apo bashkëpunëtorë të tjerë.
Policia bën thirrje për respektimin e moratoriumit të gjuetisë, duke paralajmëruar ndëshkime të ashpra për çdo rast shkeljeje që cenon biodiversitetin dhe faunën e mbrojtur të vendit.
Discussion about this post