Ministrja e Shëndetësisë, Ogerta Manastirliu ka vizituar nga afër qytetarët e shtruar në spitalin e Krujës për shkak të helmimit të ujit të pijshëm, ku në mesin e pacientëve janë edhe fëmijë e adoleshentë.
Në një deklaratë për mediat, ministrja tha se nga dita e diel deri sot në spital kanë përfunduar rreth 370 persona, me shenja të helmimit dhe që kanë marrë shërbimin e nevojshëm. Sipas saj, situata është e qetë, ndërsa shtoi se sot janë paraqitur rreth 60 qytetarë, të cilët pasi kanë marrë shërbim janë nisur për në shtëpi.
“Rreth 370 qytetarë kanë marrë shërbim. Situata është e qetë pa komplikacione. Qytetarët kanë marrë shërbimin e nevojshëm, janë konsultuar. Sot janë paraqitur rreth 60 qytetarë. Kanë marrë shërbim dhe janë nisur për në shtëpi pasi situata shëndetësore s’ka qenë e rënduar, janë edhe disa pacientë të tjerë që janë duke marrë shërbim. Janë rreth 30 qytetarë, janë edhe adoleshentë, fëmijë dhe të rritur”, u shpreh ministrja.
Manastirliu tha se janë marrë mostrat e ujit për hetime të detajuara, ndërsa shtoi se nëse do ketë shtim të rasteve, do të jetë në gatishmëri dhe spitali i Durrësit.
“Janë marrë mostrat e ujit dhe ushqimeve, hetimi po bëhet në të gjitha aspektet. Rezultati i analizave mikrobiologjike ka një afat të caktuar, kur të kemi rezultatet do kemi një raport të detajuar. I gjithë sistemi shëndetësor është në gatishmëri të plotë. Nëse do ketë raste të shtuara edhe në spitalin e Durrësit mund të vendoset në gatishmëri për rastet. Hetimi bëhet në shumë pista që të kemi të kontrolluar të gjithë aspektin e kujdesit shëndetësor“, tha ajo.
E pyetur nga gazetarët lidhur me pasojat e ujësjellësit të Krujës, inaguruar nga kryeministri Rama në fushatë, Manastirliu injoron pyetjen duke u larguar me nxitim dhe pa dhënë një përgjigje konkrete.
