Manchester United është zbavitur në takimin e mbrëmjes së sotme përballë Chelsea, duke triumfuar me shifrat 4-1 përballë bluve të Londrës.
Takimi i vlefshëm, për javën e 32-të të Premier League, u dominua plotësisht nga vendasit, të cilët nuk hasën shumë vështirësi në “Old Trafford”.
Në minutën e 6’, braziliani Casemiro zhbllokoi rezultatin duke goditur saktë me kokë.
Chelsea, kërkoi të reagonte por, United nuk e uli këmbën nga gazi. Goli i dytë, erdhi, në fund të pjesës së parë, me Martial që shënoi falë asistimit të Casemiro. Me rezultatin 2-0, u mbyll pjesa e parë.
Në fraksionin e dytë të lojës, United nuk e uli ritmin. Goli i tretë i ndeshjes, u shënua në minutën e 73’, nga portugezi Bruno Fernandes. Luzitani realizoi një gol fantastik, duke mos i dhënë asnjë mundësi portierit Kepa.
Chelsea e vuajti shumë psikologjikisht këtë gol sa, 5 minuta më vonë, reparti i tërhequr i kryeqytetasve, i dhuroi golin e katërt “Djajve të Kuq”. Rashford ‘falënderoi’ përzemërsisht për këtë peshqesh të mbrojtjes.
Deri në fundin e takimit, nuk pati asnjë moment tjetër të veçantë, përveç golit të ngushëllimit për blutë, të shënuar nga Felix (90’).
Me këtë sukses, Manchester United siguroi kualifikimin, pas një viti mungesë, në fazën e grupeve të UEFA Champions League, falë hipotekimit të vendit të katërt, në renditjen e Premier League.
Nga ana tjetër, Chelsea duhet të harrojë sa më shpejt këtë sezon falimentar. Klubi londinez, synon tashmë të largojë disa nga lojtarët e shumtë, të blerë gjatë këtij sezoni, të cilët kanë zhgënjyer me paraqitjen e tyre, duke bërë që sezoni të mbyllej në mënyrën më të shëmtuar të mundshme, jashtë pozitave që të kualifikojnë në kompeticionet europiane./m.b /gijotina.com
Discussion about this post